Búgingi zaman talaby – ulttyq sana-sezimi qalyptasqan sanaly urpaq tárbıeleý. Árıne, bul maqsatta qazir balalarǵa arnalǵan túrli ortalyqtar jumys isteıdi. Mundaı oryndarda jas óskinder qoǵammen aralasyp qana qoımaı, ózderin jańa qyrynan da tanyp úırenedi. Jańa tynysy ashylady. Iаǵnı qosymsha ortalyqtar men úıirmelerdiń balaǵa berer paıdasy kóp. Astana tórindegi Ulttyq mýzeı de balalarǵa ulttyq tárbıe berý men damytý is-sharalarynan kende emes.
Memleket basshysy Qasym-Jomart Toqaevtyń «Túptep kelgende, damýdyń birden-bir joly – bilim salasy. Sondyqtan budan eshkim utylmaıtyny sózsiz» degenindeı Ulttyq mýzeıde barlyq jastaǵy balalardyń qalyptasýyna, damýyna baǵyttalǵan ártúrli sabaq apta saıyn ótkizilip turady. Bul týraly Ekskýrsııalyq jumystar, mýzeı pedagogıkasy jáne ekspozısııalyq zaldardy saqtaý qyzmetiniń basshysy Janar Beıisova baıandady.
– Ulttyq mýzeıdiń basty baǵyttarynyń biri – elimizdiń mádenıetin, tarıhı eskertkishterin tanymal etýge baǵyttalǵan mádenı-aǵartýshylyq salasy. Mýzeı qorynda, ekspozısııalarda ult tarıhynan syr shertetin biregeı eksponattar shoǵyrlanǵan. Mádenı-aǵartý baǵdarlamasynyń aıasynda «Shańyraq», «Tarıhı tulǵa», «Ásemdikke qushtarlyq», «Dana», «Mýzeıdegi mektep kúni» sekildi birneshe joba bar. Sonymen qatar mýzeıge kelýshilerdiń barlyq kategorııasymen jumys isteımiz. Máselen, mádenı-aǵartý baǵdarlamasy aıasynda múmkindigi shekteýli balalarǵa arnalǵan «Qolóner ǵalamshary» úıirmesi ashyldy. Jyl saıyn ınklıýzıvti festıval uıymdastyrylyp turady. Sondaı-aq ótken jyly mýzeıge kelýshi erekshe jandar úshin «Taktıldi ekspozısııa» ashylǵan bolatyn jáne qulaǵy durys estimeıtin kelýshilerge sýrdoaýdarmamen ekskýrsııalar da bar. Jalpy, mádenı-aǵartý baǵdarlamasy aıasynda kóptegen is-shara uıymdastyrylady. Al qazir Naýryzǵa arnalǵan erteńgilikter ótkizilýde, balalardyń qysqy, jazǵy demalys ýaqyttarymen tuspa-tus keletin jobalar men baǵdarlamalar da kóp. Bul ýaqyttarda oqýshylar mýzeıge tegin kele alady, – deıdi.
Sondaı-aq atalǵan mýzeı ókiliniń aıtýynsha, balalar ózderi oqyp, úırenip, mýzeı boıynsha ekskýrsııa júrgizetin «Mıras» úıirmesi jumys istep tur. Odan bólek mektepke deıingi balalardyń mýzeıdi aralaýyna arnalǵan «Baldyrǵan gıd» baǵdarlamasy bar. Mýzeıdegi kanıkýldar balalar ortalyǵynda júzege asyrylady. Aýqymdy jobalardyń biri retinde «Mýzeıdegi mektep kúnin» jobasyn atap ótýge bolady. Iаǵnı muǵalimder, ǵylymı qyzmetkerler oqýshylarǵa kúntizbelik josparmen sabaq ótkizedi. Máselen, ár beısenbini «Tarıh sabaǵy kúni» deýge bolady. Osy joba aıasynda túsirilgen beınesabaqtar da bar, onyń barlyǵyn saıt arqyly kórip, mektep oqytýshylary sabaqtarynda qoldana alady.
Mýzeıdegi sondaı úıirmelerdiń biri – «Kórkem beıneleý óneri». Jetekshisi – Eýrazııa Dızaınerler odaǵynyń, Qazaqstan Sýretshiler odaǵynyń múshesi Muhtar Baıbosyn. Alǵashynda 5 oqýshymen óz jumysyn bastaǵan úıirmege qazir kelýshiler kóp. Aptasyna eki ret ótkiziletin sabaqta oqýshylar beıneleý óneriniń grafıka, keskindeme, músindeý jáne kompozısııa sııaqty salalarymen tanysyp, jumys isteıdi.
Búgingi kúnge deıin úıirme qatysýshylarynyń kóptegen baıqaýǵa qatysyp, biraz jetistikterge jetkenin de aıta ketý kerek. Jaqynda ǵana IýNESKO mektebiniń uıymdastyrýymen ótken «Qyzyl kitap balalardyń kózimen» atty respýblıkalyq baıqaýynda úıirmege qatysýshy Taır Baımenov úshinshi dárejeli dıplommen marapattaldy. Al «Jyl basy – Naýryz» respýblıkalyq kórkemsýret baıqaýynda Aısha Qasenova «Úzdik sýret» nomınasııasyn jeńip alǵan.