Májilis depýtaty Dáýlet Muqaev «Baqytty otbasy», «Shańyraq» baǵdarlamalarynyń talaptaryna ózgeris engizýdi, «7-20-25» baǵdarlamasynyń lımıtin alyp tastaýdy jáne jumys isteıtin jastarǵa beriletin jaldamaly páter sanyn arttyrýdy surady. Ol bul týraly Premer-mınıstrdiń birinshi orynbasary Roman Sklıarǵa joldaǵan depýtattyq saýalynda aıtty, dep habarlaıdy Egemen.kz.
«Qazaqstanda «Baqytty otbasy» baǵdarlamasy 2019 jyldan beri júzege asyrylyp keledi. Oǵan jyl saıyn bıýdjetten 50 mıllıard teńge tóńireginde aqsha aýdarylyp, 8 myńǵa jýyq otbasy úıli bolady. Baǵdarlama aıasynda maksımaldy nesıeleý somasy aımaqtar boıynsha (Almaty, Astana, Shymkent, Atyraý, Aqtaý) 15 mıllıon teńgege teń edi. 2019-2020 jyldary bul aqshaǵa 2 bólmeli úı alýǵa múmkindik bolsa, qazirgi ýaqytta páter baǵasy óskennen tek 1 bólmeli úı alýǵa májbúr. Kópbalaly otbasylar, kemi 4 balasy bolsa, ata-anasymen 6 adam bolady. Dál qazirgi ýaqytta jańa úıler konkýrs negizinde berilgendikten, keıbir otbasylar 32-40 sharshy metrlik bir bólmeli páterde turýǵa májbúr», dedi Dáýlet Muqaev.
Depýtat Qazaqstanda úılengen jastardyń 40 paıyzǵa jýyǵy aqyr sońynda ajyrasatynyn aıtty. Depýtattyń pikirinshe, onyń basty sebebi – materıaldyq qajettilik, onyń ishinde baspana máselesi. Sol sebepti ol «Jas otbasy» baǵdarlamasynyń bastapqy jarnasyn 10 paıyzdan aspaıtyndaı mólsherde bekitýdi usyndy.
- «7-20-25» baǵdarlamasynyń uıymdastyrýshylary «aqsha bar, bári jaqsy, baǵdarlama jumys istep tur» dep aıtady. Biraq Qazaqstanda «7-20-25» baǵdarlamasy boıynsha birde-bir bank ıpoteka bermeıdi. Sebebi oǵan maýsym saıyn lımıt qosylyp otyrady. Qarapaıym halyq bank aldynda túneýge májbúr. Bul turǵyda «7-20-25» baǵdarlamasy boıynsha lımıtti alyp tastaý qajet. Baǵdarlama 2029 jylǵa deıin sozylady delingen, oǵan deıin «aty bar, zaty joq» baǵdarlamaǵa aınalýy múmkin. Myńdaǵan adam bankten maquldaý alǵanymen, lımıt kesirinen úıdiń kiltin ala almaı júr», dedi depýtat.