Ulttyq mýzeıde «Qazaq dalasy tarıhı kartalarda: keńistik pen aýmaq qurylymdary» atty kórme ashyldy. Onda XVI ǵasyr men 1939 jyl aralyǵynda eýropalyq, amerıkalyq, reseılik kartograftar qurastyrǵan tarıhı 26 karta tanystyryldy. Bul kartalar Memlekettik keńesshi Erlan Qarınniń jeke kolleksııasynan usynyldy. Tarıhı kartalarda qazirgi elimizdiń quramyna kiretin aımaqtar kórsetilip, bekitilgen.
Kórmeni ótkizýdegi maqsat – búgingi elimizdiń ákimshilik-aýmaqtyq birlikterin quraıtyn aýmaqtar beınelengen biregeı, erekshe qundy kartalardy mádenı-aqparattyq aınalymǵa engizý.
Mádenı is-sharanyń ashylýynda sóz alǵan Ulttyq mýzeı dırektorynyń mindetin atqarýshy Aıbek Sydyqov kórmeniń mańyzyna toqtala kelip:
«Kartografııa – birneshe salany qamtıtyn kúrdeli ǵylym. Onda tarıh, geografııa, beıneleý óneri, ádebıet pen mádenıet sekildi salalar bir arnada toǵysady. Sondyqtan kartografııanyń keńinen nasıhattalýy halqymyzdyń tarıhı sanasynyń jańǵyrýyna yqpal etedi», dedi ol.
Sondaı-aq Parlament Májilisiniń depýtaty, tarıh ǵylymdarynyń doktory, professor Erkin Ábil tarıhı geografııa men arhıv isin tereń zertteý memleket tutastyǵynyń bir kepili ekenin aıtty.
Kórme bes bólimnen turady. «Atlastar dáýiri» atty birinshi bólimde XVI-XVII ǵasyrlarda jasalǵan 7 karta qoıylǵan. Avtorlary – aǵylshyn, ıtalıan, nıderland jáne nemis kartograftary. Ekinshi bólim – «Jańa zaman kartografııasyndaǵy Qazaq dalasy». Onda sheteldik ǵalymdar qurastyrǵan 5 karta bar. Máselen, Djon Kerrı Reseı ımperııasynyń kartasyn jasaǵanda qazaqtardyń 1799 jylǵy etnostyq aýmaǵyn da tanystyrady. Úshinshi bólim – «Eýropalyq kartografııanyń sharyqtaý kezeńindegi Qazaq dalasy» dep atalǵan. Munda 4 karta bar, ishindegi eń qundysy – Djon Martın Rapkınniń «Táýelsiz Tartarııa» kartasy. Bul karta shamamen 1846-1851 jyldary basylsa kerek. «XIX ǵasyrdaǵy Áskerı topograftar jumysyndaǵy Qazaq dalasy» degen tórtinshi bólimde 8 karta usynylǵan. Olardy Reseı ımperııasy Bas shtabynyń Qazaq dalasyn zerttegen ofıserleri daıyndaǵan. Al besinshi bólimde «Qazaq KSR. 1939 j» tarıhı kartasy berilgen. Bul kartadan Ekinshi dúnıejúzilik soǵys aldyndaǵy Qazaq KSR-iniń ákimshilik qurylymyn kóresiz.