Áleýmettik joba aýyldyq jerlerde turatyn jastardyń memlekettik baǵdarlamalardan habardarlyǵyn arttyrýǵa múmkindik beredi, dep habarlaıdy Egemen.kz.
«Aýyldyq aýmaqtarda jastar kásipkerligin damytýǵa járdemdesý» granttyq jobasyn «Qazaqstannyń ekologııalyq qory» qoǵamdyq qory iske asyrady. Joba sheńberinde respýblıkanyń 17 óńirinde jumyspen qamtý jáne kásipkerlikti, qoǵamdastyqty damytý baǵytyndaǵy memlekettik qoldaý sharalaryna arnalǵan aqparattyq buryshtar men aqparattyq resýrs qurylatyn bolady.
«Biz aýyl jastary arasyndaǵy áleýmettik kásipkerlerdiń iskerlik belsendiligin arttyrýǵa bar kúsh-jigerimizdi jumsaýǵa nıettimiz. Bul aýyldardaǵy tabysty áleýmettik tájirıbelerdi anyqtaýǵa jáne olardy respýblıkalyq deńgeıge shyǵarýǵa múmkindik beredi.
Jobany iske asyrý barysynda elimizdiń barlyq óńirlerinde biz kásipkerlikti damytýdy memlekettik jáne jeke qoldaý sharalary túsindiriletin buryshtardy uıymdastyramyz. Sondaı-aq aýdan ortalyqtarynda NEET sanatyndaǵy aýyl jastaryna arnalǵan kóshpeli dárister men semınarlar ótkizýdi josparlap otyrmyz. Balalardy eńbek naryǵyndaǵy trendter men perspektıvaly kásipter týraly habardar etetin bolamyz. Tutastaı alǵanda, josparymyzda 1600-den astam adamdy qamtýdy bar», dep túsindirdi joba jetekshisi Aıgúl Abdýalıeva.
Joba uıymdastyrýshylarynyń málimetterine súıensek, NEET sanatyndaǵy jastardyń basym bóligi Ulytaý (12,7%), Shyǵys Qazaqstan (8,5%), Qaraǵandy (9,4%), Qyzylorda (8%) oblystarynda, Mańǵystaý (7,5%), Túrkistan (7,3%), Aqmola (5,6%), Qostanaı oblystarynda turady.
Aıta keteıik, «Aýyldyq aýmaqtarda jastar kásipkerligin damytýǵa járdemdesý» jobasy QR Aqparat jáne qoǵamdyq damý mınıstrliginiń qoldaýymen 2024 jyldyń sońyna deıin iske asyrylmaq.