Qazaqstan Prezıdenti Qasym-Jomart Toqaev pen Ázerbaıjan Prezıdenti Ilham Álıev shaǵyn quramda kelissóz júrgizdi, dep habarlaıdy Egemen.kz Aqordanyń baspasóz qyzmetine silteme jasap.
Qasym-Jomart Toqaev shaqyrýyn qabyl alyp, Astanaǵa resmı saparmen kelgeni úshin Ilham Álıevke alǵys aıtty.
«Byltyr tamyz aıynda men Bakýge saparmen bardym. Bul saparym asa nátıjeli boldy jáne ekijaqty qatynastarǵa tyń serpin berdi. Qazir prezıdentterdiń eki el úkimetine bergen tapsyrmalarynyń oryndalý barysyn pysyqtaý qajettiligi týdy. Ázerbaıjan men Qazaqstan – baýyrlas ári dostas memleketter. Bizdiń tarapymyzdan saýda-ekonomıka jáne ınvestısııa salalaryndaǵy jan-jaqty yntymaqtastyqty, sondaı-aq ekijaqty formattaǵy jáne halyqaralyq uıymdar aıasyndaǵy saıası qarym-qatynasty damytý úshin barlyq múmkindik jasalyp jatyr. Biz Kavkaz aımaǵynda jetekshi ról atqaratyn Ázerbaıjan memleketimen ekonomıkalyq qatynastar men yntymaqtastyqty damytý úshin aýqymdy jumys júrgizýdi kózdep otyrmyz. Bizdiń aramyzda eshqandaı másele joq. Tek qana osy baǵytta alǵa ilgerileýge degen nıet qana bar», dedi Qasym-Jomart Toqaev.
О́z kezeginde Ilham Álıev qazaqstandyqtarǵa qonaqjaılylyǵy úshin alǵys aıtyp, qos tarap arasyndaǵy yntymaqtastyq gúldene beretinine senim bildirdi.
«Qurmetti Qasym-Jomart Kemeluly, eń aldymen, arnaıy shaqyrǵanyńyzǵa jáne qonaqjaılyǵyńyzǵa alǵys aıtamyn! Geıdar Álıevke kórsetken qurmetińiz úshin búkil Ázerbaıjan halqynyń jáne jeke óz atymnan rızashylyǵymdy bildirgim keledi. Jalpy, biz barsha Qazaqstan halqynyń elimizge degen ystyq yqylasyn árqashan sezinip kelemiz. Ázerbaıjanǵa resmı saparyńyz barysynda osyndaı tileýlestikti Siz de baıqadyńyz dep oılaımyn. Bizdiń resmı saparlar aıasynda jıi kezdesýimiz osy qarym-qatynasymyzdyń sıpatyn ańǵartady jáne udaıy baılanysta bolý qajet ekenin kórsetedi.О́zińiz aıtqandaı, bizdiń elderimizdiń bir-birine degen baýyrlastyq nıeti shynaıy. Bul – ekijaqty yntymaqtastyqty damytýǵa jaqsy negiz. Yntymaqtastyq baǵyttaryna keletin bolsaq, olardy sanamalaýǵa biraz ýaqyt ketedi. О́ıtkeni ol qoǵamnyń barlyq salasyn qamtıdy. Árıne, qazirgi jaǵdaıda saýda-ekonomıkalyq jáne ınvestısııalyq jobalar, sondaı-aq kólik-logıstıkalyq ınfraqurylymǵa qatysty jobalar basymdyqqa ıe», dedi Ázerbaıjan Prezıdenti.