Barlyq adam óz baspanasy bolǵanyn qalaıdy. Alaıda oǵan jurttyń báriniń múmkindigi jetpeı jatady. Osy oraıda turǵyn úıdi satyp alý úshin «О́z úıim» baǵdarlamasy boıynsha kóńilge qonymdy paıyz usynyp otyrǵan qarjylyq ınstıtýttyń biri – «Otbasy bank» .
Bul bank óz salymshylaryna turǵyn úıdi 30 paıyzdyq bastapqy jarnamen satyp alýǵa múmkindik jasap otyr. Banktiń Atyraý oblystyq fılıaly dırektorynyń mindetin atqarýshy Nurbolat Batyrdyń aıtýynsha, nesıeleý tetiginiń jyldyq mólsheri – 7 paıyz (JTSM 7,2%-dan bastap). Nesıeniń eń kóp somasy 100 mln teńgege deıin 25 jylǵa beriledi.
Osy kezge deıin «Otbasy bank» arqyly ekinshi naryqtaǵy turǵyn úıdi satyp alýshylar alǵashqy jarnany 50 paıyzǵa deıin jınaýy qajet edi. Bul – banktiń iske asyryp jatqan turǵyn úı qurylysy jınaqtary júıesiniń talaby. Endi atyraýlyqtar úshin «MBS Capital» JShS-men jasalǵan kelisimsharttyń nátıjesinde salymshylar úshin bastapqy jarnanyń somasy 30 paıyzǵa deıin tómendeıtin boldy.
– Jyl saıyn «Otbasy bank» arqyly turǵyn úı nesıesin alatyn qazaqstandyqtar qatary kóbeıip keledi. Máselen, jyl basynan beri 10 200 nesıe berildi. Al Atyraýda bizdiń bankten turǵyn úı nesıesin alǵan 700-den astam adam jeke baspanaǵa ıe boldy. О́ńir turǵyndary turǵyn úı jarnasyn jınaqtaý jáne baspana satyp alý úshin kún saıyn shamamen jańadan 90-100 depozıt ashady. Bizdiń ınvestorlarymyzdyń kópshiligi turǵyn úıdi kommersııalyq qurylymdardan satyp alady. Alaıda olardyń barlyǵy memlekettik baǵdarlamalardyń sharttaryna sáıkes kele bermeıdi. Sol sebepti biz olar úshin nesıeleýdiń jańa tetigin ázirledik. Mundaǵy negizgi maqsat – jarnany 50-den 30 paıyzǵa deıin tómendetý. Turǵyn úı qurylysyn júrgizetin kompanııa bólgen sýbsıdııa ony azaıtýǵa múmkindik berip otyr, – deıdi Nurbolat Batyr.
Qazir atalǵan kompanııa Atyraý qalasyndaǵy «Nursaıa» shaǵyn aýdanynda «Elorda Residence» turǵyn úı kesheniniń qurylysyn júrgizip jatyr. Qurylys kompanııasy dırektorynyń orynbasary Ǵazıza Kereshtiń málimetine qaraǵanda, jańa dáýir talabyna saı boı kóterip jatqan turǵyn úı kesheni úshin 1,6 gektar jer telimi berilgen. Munda 9 qabatty 4 turǵyn úıdiń qurylysy qolǵa alynǵan. Jańa turǵyn úılerde 198 páter bolady.
Turǵyn úı kesheni alabynda birneshe másele oń sheshimin tabady. Naqty aıtsaq, demalys alleıasy jasalyp, landshafty kógaldandyrý qolǵa alynady, balalar jáne sport alańdary, jabyq kólik turaǵy ashylady. Balalar jáne salamatty ómir saltyn ustanýshylar úshin fıtnes ortalyqtary bolady. Páter ıeleriniń bárine arnaıy kompanııa servıstik qyzmet kórsetpekshi.
– Bizdiń kompanııa aldymen qurylys materıaldarynyń sapasyna basa mán beredi. Eń bastysy, kompanııamyzǵa «Qazaqstan turǵyn úı kompanııasy» AQ-nyń memlekettik kepildemesi berilgen. Bul qurylysy júrip jatqan turǵyn úı kesheninen páter satyp alýdyń qaýipsiz ekenin bildiredi. Biz memlekettik kepildik arqyly turǵynjaı satyp alýshylarmen úleskerlik kelisimshart jasaı alamyz. Alǵashqy jarnasy 20 paıyzdan bastalady. Al satyp alýshylar páter qunyn tolyq tólese, baǵa jeńildigi bar. Páterdi qosymsha kepildiksiz ıpotekaǵa satyp alýǵa bolady, – dep túsindirdi Ǵazıza Keresh.
Bank fılıaly byltyr «Atyraý jastary» turǵyn úı baǵdarlamasyn iske qosty. Oblys ákimdigi men «Otbasy bank» AQ-nyń birlesken jobasy 35 jasqa deıingi jastarǵa arnalǵan. Bul jobaǵa oblys ákimdigi 1 mlrd teńge, al atalǵan bank 600 mln teńge bóledi. Maqsat – jastardyń barynsha tıimdi sharttarmen baspana satyp alýyna jol ashý. Bul baǵdarlamaǵa dárigerler, muǵalimder, mádenıet jáne sport salalarynyń ókilderi, joǵary oqý oryndarynyń professorlary, ǵylymı-zertteý ınstıtýttarynyń ǵylymı qyzmetkerleri, jýrnalıster, áleýmettik sala men kommýnaldyq kásiporyndarda jumys isteıtinder, sondaı-aq turǵyn úı kezeginde turǵan jetim balalar qatysa alady.
Atyraý qalalyq turǵyn úı-kommýnaldyq sharýashylyq, kólik jáne avtokólik joldary bólimi turǵyn úı sektorynyń meńgerýshisi Rafhat Joldıevtiń málimetine súıensek, 1-20 aqpan aralyǵynda «Atyraý jastary» turǵyn úı baǵdarlamasyna qujat qabyldaý júrgizilgen. Jańa baǵdarlama arqyly baspana satyp alý úshin 860 jas ótinish bergen. Onyń ishinde 830 jastyń ótinishi maquldanǵan.
«Atyraý jastary» baǵdarlamasy boıynsha qujat tapsyrǵandardyń arasynan 100 adamǵa baspana beriledi. Onyń ishinde Atyraý qalasynan – 55, aýdandardan 45 jas bar. Baspana alý múmkindigi bar qalalyq jastardyń tizimi jasaqtalyp jatyr. Bul tizim bankke joldanady. Ári qaraı nesıeni rásimdeý, turǵyn úı satyp alý bastalady», deıdi R.Joldıev.
Baǵdarlamaǵa qatysýshylar ózderiniń tólem qabilettiligin rastaǵannan keıin jyldyq 5 paıyzben turǵyn úı zaemyn alady. Onyń alǵashqy jarnasy – 10 paıyz. Beriletin nesıeniń eń kóp somasy 18 mln teńgeni quraıdy. Bul qarjy Atyraý qalasynan úı satyp alýshylarǵa beriledi. Al óńirdiń aýdandarynan baspana satyp alý úshin 13 mln teńgege deıin nesıe berý kózdelgen. Nesıe merzimi – 25 jyl.
Atyraý oblysy