Búgingi tańda Ekologııa jáne tabıǵı resýrstar mınıstrligine qarasty Balyq sharýashylyǵy komıtetiniń qaramaǵyndaǵy memlekettik balyq ósirý kásiporyndarynyń qatardaǵy qyzmetkerleriniń jalaqysy shamamen 90 myń teńgeni quraıdy, bul elimizdegi eń tómengi jalaqyǵa jaqyn, dep habarlaıdy Egemen.kz.
Balyq ósirý kásiporyndaryndaǵy jumysshylar qyzmetiniń ereksheligi men aýyr fızıkalyq eńbegin eskere otyryp, qoldanystaǵy eńbekaqy tóleý júıesi olardyń salany damytýǵa qosqan úlesine sáıkes kelmeıdi.
Osyǵan baılanysty, turaqty eńbek ujymyn qalyptastyrý jáne jas mamandardy tartý arqyly kadrlyq áleýetti nyǵaıtý úshin kásiporyndardyń salalyq qyzmetkerleriniń jalaqysyn arttyrý máselesi pysyqtaldy.
Osylaısha, 1 shildeden bastap balyq ósirý salasynda qyzmet atqaryp jatqan jumysshylardyń jalaqysy 2 ese kóteriledi dep josparlanyp otyr.