Bas prokýratýra Almaty jáne Jetisý oblystary Polısııa departamentiniń burynǵy basshysy Serik Kúdebaevqa qatysty memlekettik shekarany zańsyz kesip ótý faktisi boıynsha qylmystyq is qozǵady, dep habarlaıdy Egemen.kz.
Almaty oblysy IID burynǵy basshysy Serik Kúdebaevtyń zańsyz memlekettik shekaradan ótýi boıynsha Ulttyq qaýipsizdik organdarymen is qozǵalǵan edi. Biraq istiń mańyzyn eskere otyryp bul isti Bas prokýratýra óziniń óndirisine qabyldap aldy. Bul is boıynsha jedel tergeý toby quryldy. Onyń quramyna barlyq quqyq qorǵaý organynyń eń myqty, tájirıbeli tergeýshileri men jedel ókilderi qosyldy. Bul týraly Májilis kýlýarynda QR Bas prokýrordyń orynbasary Jandos О́mirálıev aıtty.
«Qyrǵyzstanǵa ketti degen málimet bolǵandyqtan osy elge tıisti saýal joldadyq. Oǵan jaýap aldyq. Qyrǵyz Respýblıkasy quqyq qorǵaý organdarymen birlesip, birge jumys isteýge múmkindik aldyq. Qazir jumys júrip jatyr. Qyrǵyz Respýblıkasyndaǵy áriptesterimizdiń málimetine saı Kúdebaev Qyrǵyzstanǵa barǵannan keıin, Manas áýejaıy arqyly Ystanbul qalasyna ushyp ketti degen málimet berdi», dedi Jandos О́mirálıev.
Jýrnalıster odan «Túrkııa eline suranys nege jiberilmedi?», dep surady.
«Túrkııamen eki jaqty kelisimge qol qoıylǵan. Eki jaqty kelisim nátıjesinde Túrkııadaǵy quqyq qorǵaý organdarymen jumysymyzdy bastap kettik. Osy is boıynsha búkil málimetti, nátıjeni aıtqym kelmeıdi. Sebebi bul málimetti biz ǵana emes, sizder ǵana emes, búkil BAQ bilip, onyń ózi jáne jaqtastary da bilip, bizdiń izdestirý amaldarymyzǵa kedergisin tıgizýi múmkin. Sol sebepti ne úshin barlyq málimetti aıtpaı otyrǵanymdy túsinesizder ǵoı», dep jaýap berdi ol.