Jyldyń basynan beri Áleýmettik qyzmetter portaly arqyly shamamen 107,3 myń múgedektigi bar adam ońaltýdyń tehnıkalyq quraldaryn, 6,1 myń – ymdaý tili qyzmetin, 25 myń – jeke kómekshiniń qyzmetin aldy, dep habarlaıdy Egemen.kz Eńbek jáne halyqty áleýmettik qorǵaý mınıstrligine silteme jasap.
Portal múgedektigi bar adamdarǵa ońaltýdyń tehnıkalyq quraldary men qyzmetterin óndirýshini jáne jetkizýshini óz betinshe tańdaýǵa múmkindik beredi. Kómek túrine tapsyrys berý kórsetiletin qyzmetti alýshynyń elektrondyq sıfrlyq qoltańbasymen rastaý arqyly júzege asyrylady. Tapsyrys berilgen ońaltýdyń tehnıkalyq quraldaryn jetkizý nemese óz betinshe áketý arqyly alýǵa bolady.
Múgedektigi bar adamdardy ońaltý quraldarymen qamtamasyz etý protezdik-ortopedııalyq, sýrdotehnıkalyq, tıflotehnıkalyq jáne gıgıenalyq quraldar, sondaı-aq kreslo-arbalar berýdi qamtıdy.
Aıta ketsek, portalda arnaýly áleýmettik qyzmetter kórsetetin 849 medısınalyq-áleýmettik mekeme (bólimsheler), 378 OTQ jetkizýshi, 26 myńnan astam jeke kómekshi, 685 ymdaý tili jáne 105 sanatorlyq-kýrorttyq emdeý qyzmetterin jetkizýshi tirkelgen.
«Áleýmettik qyzmetter portaly» avtomattandyrylǵan aqparattyq júıesin engizý Múgedektigi bar adamdardyń quqyqtaryn qamtamasyz etý jáne ómir súrý sapasyn jaqsartý jónindegi ulttyq jospar sheńberinde qarastyrylǵan.
Portaldy paıdalaný boıynsha konsýltasııalardy qoldaý baılanys ortalyǵynan, ıaǵnı 1414 biryńǵaı nómiri arqyly habarlasýǵa bolady.