«Qazaqstannyń halyq ártisi» qurmetti ataǵyna ıe mádenıet qyzmetkerlerine tólenetin ústemeaqy mólsheri eki ese ulǵaıady. Endi bul marapat ıelerine bazalyq laýazymdyq eńbekaqynyń 100% mólsherinde ústemeaqy tólenedi. Qaýly jobasy jýyrda ótken Úkimet otyrysynda bekitildi.
Memleket basshysy Qasym-Jomart Toqaevtyń tapsyrmasymen bıyldan bastap «Qazaqstannyń halyq ártisi» ataǵy qaıta beriletin bolǵan edi. Qurmetti ataqqa laıyq mádenıet qaıratkerleri Respýblıka kúni qarsańynda marapattalady.
Aıtýly marapat elimizdiń teatr, sırk, mýzyka jáne kıno ónerin damytýǵa erekshe úles qosqan, osyǵan deıin «Qazaqstannyń eńbek sińirgen ártisi» nemese «Qazaqstannyń eńbek sińirgen qaıratkeri» ataǵyna ıe bolǵan mádenıet qyzmetkerlerine beriledi.
«Qazaqstannyń halyq ártisi» ataǵyn qaıta taǵaıyndaý memleket tarapynan óner qaıratkerleriniń eńbegin baǵalaýǵa, kásibı qasıetterin damytyp, jetildirýge, kásibı sheberlik deńgeıin arttyryp, jańa óner týyndylaryn jasaýǵa yntalandyrýǵa yqpal etedi. Sondaı-aq jas býynnyń shyǵarmashylyq jaǵynan ósýine, urpaqtar sabaqtastyǵyna qyzyǵýshylyq arttyrýǵa úles qosady», dedi Mádenıet jáne sport mınıstri Ashat Oralov.