Memleket basshysy Qasym-Jomart Toqaevtyń «Ortalyq atqarýshy organ basshylarynyń halyqpen kezdesýin ótkizý týraly» Jarlyǵyna sáıkes Shymkentke Densaýlyq saqtaý mınıstriniń birinshi orynbasary Tımýr Sultanǵazıev jumys saparymen keldi. Issapar barysynda birinshi vıse-mınıstr birqatar medısınalyq nysanda boldy.
Aldymen ol 260 stasıonarlyq tósektik orny bar qalalyq onkologııa ortalyǵy men sonyń bir aýysymda 150 adam qabyldaýǵa arnalǵan emhanasyna at basyn burdy. Onkologııa ortalyǵy hımıoterapııalyq, radıologııalyq, pallıatıvtik, radıogınekologııalyq, hırýrgııalyq, mammologııalyq jáne onkogematologııalyq bólimshelerden quralǵan. Munda taǵy 30 tósektik oryn kúndizgi stasıonar, klınıkalyq-dıagnostıkalyq emhana, onyń ishinde sáýlelik dıagnostıka bólimshesi, sıto-gıstologııalyq zerthana jáne klınıkalyq-dıagnostıkalyq zerthana bar. Atalǵan medısınalyq uıymda 85 dáriger jáne 200-den asa orta medısına qyzmetkeri jumys isteıdi.
Birinshi vıse-mınıstr qalalyq onkologııa ortalyǵynyń jumysymen egjeı-tegjeıli tanysyp, sheshimin kútken salalyq problemalardy talqylady. Áńgime barysynda pasıentterdi emdeýde qoldanatyn ınnovasııalyq tehnologııalar sóz boldy. Máselen, qazirgi zamanǵy endobeınehırýrgııalyq keshenniń kómegimen kishi jambas jáne keýde men ishki aǵza aýrýlaryna az ınvazıvti operasııalar júrgizile bastady. 2019 jyldan bastap munda aıaq-qol sarkomalary kezinde iri býyndardy protezdeý isi qolǵa alyndy.
Sondaı-aq ortalyqta sút bezi obyryna shaldyqqan naýqastarǵa psıhologııalyq jáne áleýmettik ońaltý sharalary qarastyrylǵan. Bul qatarda teri-bulshyqet qıyndylaryn qoldana otyryp jasaıtyn ártúrli rekonstrýktıvtik-plastıkalyq operasııalar bar. Keıingi 4 jylda klınıkada 80-nen asa osyndaı rekonstrýktıvtik operasııa jasalypty. Qazirgi zamanǵy Phillips AZURION bıplan angıografyn onkolog mamandar 1,854 rentgenhırýrgııalyq operasııa jasaýda qoldanǵan.
Budan soń T.Sultanǵazıev 400 tósektik orynǵa eseptelgen №2 qalalyq aýrýhanany aralady. О́tken jyly munda 21 myńnan asa pasıent emdelipti. Birinshi vıse-mınıstr medısınalyq kómek kórsetý sapasyna, ásirese emhana jáne aýyldyq MSAK obektilerimen dıspanserlik pasıentterdi esepke alý jáne emdeý, sondaı-aq QJA aýrýlary kezinde ınsýlttik naýqastarǵa medısınalyq kómek kórsetý deńgeıin arttyrý máselesine nazar aýdardy.
Vedomstvo ókiliniń jumys sapary budan ári №1qalalyq emhanada jalǵasty. Atalǵan emdeý mekemesi búgingi tańda 45 myńǵa jýyq turǵynǵa qyzmet kórsetedi. О́z kezeginde T.Sultanǵazıev aýrýlardyń profılaktıkasyn, skrınıngtik zertteýlerdiń tıimdiligin arttyrýdy, pasıentterdi ýaqtyly dıspanserleýdi jáne aýrýlardy basqarý baǵdarlamasyn júzege asyrýdy kúsheıtý qajettigin atap ótti jáne pasıentterdi qoldaý qyzmetin jandandyrýdy usyndy.
Megapolıstegi medısınalyq uıymdardy aralap bolǵan T.Sultanǵazıev qorytyndy sóz sóıledi. Onda onkologııalyq aýrýlardy erte satysynda anyqtaý kerek ekenin, MSAK-tyń ozyq tájirıbelerin keńinen engizýdi, ákimdikpen birlesip medısınalyq mekemelerdi tıisti kadrlarmen qamtamasyz etýdi tapsyrdy. Sondaı-aq uıymdardyń menedjmentin damytýdy, jańa tehnologııalar men jumys ádisterin engizýdi sóz etti.
«Búgingi tańda densaýlyq saqtaý júıesiniń basym baǵyttarynyń biri halyqqa sapaly jáne qoljetimdi medısınalyq kómek kórsetý ekenin atap ótkim keledi. 2022 jyly Shymkent qalasynda jalpy ólim-jitim 35%-ǵa tómendegenin, sondaı-aq qanaınalym júıesi aýrýlarynan ólim-jitim 21%-ǵa, obyrdan-10%-ǵa, tynys alý aǵzalarynyń aýrýlarynan jáne týberkýlezden ólim-jitim 47%-ǵa azaıdy. Halyqtyń suraýy boıynsha jalpy praktıka dárigeriniń joldamasynsyz konsýltasııalyq-dıagnostıkalyq qyzmetter kórsetý qaǵıdalary bekitildi. Sondaı-aq onkologııalyq jáne gematologııalyq aýrýlarǵa kúdik bolǵan kezde tekserý men emdeýdi jedeldetý úshin «Jasyl jol» engizildi. Onyń aıasynda onkologııalyq aýrýǵa kúdigi bar pasıentter 18 jumys kúni ishinde konsýltasııa alady jáne tekseriledi», dedi T.Sultanǵazıev.
Onyń aıtýynsha, búgingi tańda densaýlyq saqtaý júıesinde 78 myń dáriger, onyń ishinde Shymkent qalasynda 2 myń dáriger jumys isteıdi. О́ńirde dárigerlerdiń tapshylyǵy 98 mamandy quraıdy. О́tken jyly el óńirlerine medısınalyq joǵary oqý oryndarynyń 1 809 túlegi, onyń ishinde Shymkent qalasyna 74 túlek bólindi. Dárigerlerdiń qajettiligin qamtamasyz etý úshin asa tapshy mamandyqtar boıynsha byltyr respýblıkalyq bıýdjet esebinen 4 700 bilim granty, onyń ishinde 1 500 rezıdentýra granty bólindi. Shymkent qalasynyń úlesi 74 grantty quraıdy. Memleket basshysy úsh jyldyń ishinde rezıdentýraǵa beriletin granttar sanynyń jyl saıyn 70%-ǵa ulǵaıýyn qamtamasyz etýdi tapsyrǵan edi. Osyǵan baılanysty bıyl rezıdentýraǵa 2 500 grant bólý josparlanyp otyr. Buǵan qosymsha osy jyly sertıfıkattaý kýrstary arqyly arnaıy mamandardy daıarlaý úshin jańa bilim berý baǵdarlamalary engiziledi. Memleket basshysynyń tapsyrmalaryn iske asyrý aıasynda Májilis qaraýyna medısına qyzmetkerleriniń kásiptik jaýapkershiligin saqtandyrý jónindegi zań jobasy ázirlenip engizildi, bul birinshi oqylymda maquldandy. 2023 jyly Zań qabyldanǵannan keıin medısına qyzmetkerleriniń kásiptik jaýapkershiligin saqtandyrý júıesi iske qosylady.
Sonymen qatar birinshi vıse-mınıstr Ońtústik Qazaqstan medısına akademııasynda oqý ornynyń jalpy jumysymen tanysyp shyǵyp, murajaıyn tamashalady. Buǵan qosa ol jumys sapary aıasynda OQMA bazasynda halyqpen kezdesti, azamattardy jeke máselesi boıynsha qabyldap, óńirlik kommýnıkasııalar alańynda brıfıng ótkizdi.
Qala jurtshylyǵymen kezdesýde T.Sultanǵazıev medısına qyzmetkerleriniń kásiptik jaýapkershiligin kúsheıtý, pasıentterdiń quqyqtaryn qorǵaý jáne qoǵamdaǵy dárigerler mártebesin nyǵaıtý baǵytyndaǵy qabyldanar jańa zańnamalar týraly habarlady. Sondaı-aq vedomstvonyń ambýlatorııalyq deńgeıde dári-dármekpen qamtamasyz etýdi jaqsartyp jatqanyn jáne kadr saıasaty men «Ańsaǵan sábı» arnaıy baǵdarlamasyn iske asyrý nátıjeleri týraly aıtyp berdi. Máselen, sonyń aıasynda 2026 jylǵa deıin EKU-ǵa jyl saıyn 7 myń kvota bólý kózdelgen. Osy baǵdarlama boıynsha ótken jyly Shymkentke 413 kvota bólinip, 214 áıel EKU qyzmetine júginse, 90 otbasy bala súıý baqytyna ıe bolǵan.
Barlyq aıtylǵan ótinish pen suraqqa birinshi vıse-mınıstr tolyq jaýabyn berdi. Qajet jerinde arnaıy túsindirdi. Sosyn beıindi departamentterge júgingen azamattarǵa qajetti járdem kórsetýdi tapsyrdy.