Prezıdent janyndaǵy Memlekettik basqarý akademııasynda ár juma saıyn ótetin «Damý kúniniń» kezekti spıkeri tarıhshy, «Voshojdenıe po nıshodıasheı» kitabynyń avtory Nurtaı Agýbaev boldy.
Kezdesýde avtor aqparat aǵyny qarqyn alǵan shaqta sananyń fragmenttelýine jol bermeýdiń, áleýmettik robottandyrýdyń qurbany bolmaýdyń joldaryn, jasandy fılosofııa men shynaıy fılosofııanyń arasynda tańdaýdy qalaı jasaý kerek ekenin túsindirdi. Sondaı-aq ol ómirdiń adamǵa qandaı sabaq beretinin, nelikten sanaly dıalog qyzý pikirtalastan mańyzdy ekenin aıtty.
«Kitap Qazaqstan úshin kórkem janr, pýblısıstıka jáne zertteý sıntezine negizdelgen memýarıstıkanyń jańa túrin usynady. Onda «taǵdyr» uǵymynyń ózindik ınterpretasııasy berilgen, al ómir tarıhy adamnyń ózindik «Menine» basa nazar aýdarmaı, qorshaǵan álemdi túsiný prızmasy arqyly berilgen», dedi Nurtaı Agýbaev kitaptyń mazmunyna toqtalyp.
Sonymen qatar bul eńbekte avtor burynǵy keńes odaǵy halyqtaryna tán «katastrofııalyq sana» jáne bolyp jatqan ózgeristerdi túsinbeýshilikten týyndaǵan «konflıkttik oılaý» sııaqty uǵymdardy talqylaıdy.
Akademııada bilim alyp jatqan memlekettik qyzmetshilerdi «bıýrokratııalyq rıtýalızm jáne onyń saldary» taqyryby qyzyqtyrdy. Avtor da osy máselege teńirek toqtalyp, saýaldarǵa jaýap berdi.