Tııanaqsyz merdiger tenderdi qalaı utady?

Jyl saıyn bıýdjetten qyrýar qarjy bólingenimen, bul tarapta­ǵy jumys mysyqtabandap jyljýda. Bar sharýany aqyl tarazysyna salsańyz, eldi mekenderdiń aýyz sýǵa jarymaı otyrý sebebi, osy sharýany atqarmaq bolyp moınyna alǵan, ıakı tenderdi utqan merdigerlerdiń óz mindetin durys atqarmaýynan degen oı túıýge bolady. Búgingi tańda otyzǵa jýyq nysannyń sharýasy – óte ótkir kúıde. Máselen, keıbir jobalardy júzege asyrý merzimi ótse de, aıaqtalýy kóp ýaqytqa sozylyp ketken. Onyń ishinde bes jyl boıy tıisti jumysyn atqara almaı júrgender de bar. Máselen, «Monolıt» seriktestigi oblystyń birneshe aýdanynda aýyz sýmen jabdyqtaý júıelerin salý jáne jańǵyrtý baǵytynda alty jobany júzege asyrýda. Bul jumysqa 2 mlrd teńgeden asa bıýdjet qarajaty baǵyttalǵan. О́kinishke qaraı, is alǵa jyljyr emes. Osy arada naqty derek keltire ketelik. Zerendi aýdanyna qarasty Alekseevka aýylyndaǵy sýmen jabdyqtaý nysanyn tapsyrý merzimi kelisimshartta 2021 jyl dep kórsetilgen. Áıtse de, qurylys jumystary kúni búginge deıin aıaqtal­ǵan joq. Sybaılas jemqorlyqqa ­qar­sy is-qımyl agenttiginiń oblys­tyq departamentiniń tekserýi kezin­de seriktestiktiń mamandary men tehnı­kasynyń joq ekeni anyqtal­ǵan. Tenderden utqan «Monolıt» se­rik­testigi barlyq jumysty qosal­qy mer­diger uıymdardyń kúshi­men júrgizip jatyr. О́zinde eshbir materıaldyq-tehnıkalyq bazasy joq osy seriktestik elimizdiń alty oblysynda 27 jobany júzege asyryp jatqan kórinedi. Sonda memlekettik satyp alý konkýrstary­na qalaı qa­tys­qan. Árıne, maman­dary, qajetti teh­nı­ka­lary bolmaǵandyqtan, qury­lys ju­mysynyń uzaqqa sozylatyny belgili.

Taǵy bir merdiger kompanııa – Uly­taý oblysynda tirkelgen «Dáne­ker» jaýapkershiligi shekteýli se­rik­testigi. Bul seriktestik Ereımentaý aýdanyna qarasty Sileti eldi meke­ninde, Bulandy aýdanynyń orta­ly­ǵy Makınsk qalasynda, Birjan sal aýda­nyndaǵy Úlgi aýylynda sýmen jabdyqtaý júıelerin salýmen aınalysady. Joǵaryda atalǵan úsh ny­sannyń jumys kestesinde de aıta qalarlyqtaı artta qalýshylyq oryn alyp otyr. Birjan sal aýdanynyń ákimi Dostanbek Esjanovtyń aıtýyna qaraǵanda, ótken jyly kompanııamen shart jasalyp, aýylda sý jelisin tartý qurylysyn júrgizý úshin qarajat tolyq kólemde tólengen. Alaıda osy ýaqytqa deıin jumystyń 38 paıyzy ǵana aıaqtalypty. Ákimdik amalsyzdan óz isine jaýapkershilikpen qaramaǵan merdigermen shartty buzyp, qyzmet kórsetýshini josyqsyz dep taný jáne turaqsyzdyq aıybyn óndirip alý úshin sotqa júgingen. Aqsha óndirilip alar, biraq osy ýaqytqa deıin aýyz sýdyń azabyn tartyp otyrǵan aýyl turǵyndaryna kúrdeli jaıdyń kúrmeýi nelikten sheshilmeı otyrǵanyn qalaı túsindirýge bolady? Taıaýda jańa konkýrs jarııalanbaq. Endigi merdiger óz isine tııanaqty bolsa jarar edi. Selınograd aýdanynda da osy kompanııamen jasalǵan shart buzylǵan. Sot sheshimi boıynsha seriktestikke bıýdjetten tólengen 40 mln teńgege qajetti qural-jabdyqty jetkizý tapsyrylǵan. Jalpy, «Dáneker» seriktestigi elimizdiń birqatar oblysynda tapsyrys berýshilerdiń 13 talap-aryzy boıynsha josyqsyz qatysýshy dep tanylyp otyr.

Bul tarapta saqaldy qurylys az emes. 2017 jyldan bastap Shýche qalasyndaǵy sý jelileri men nysandaryn salý jáne birqatar nysandy jańǵyrtý, Býrabaı kenti sý tazartý qurylystaryn salý jumys­tary jalǵasýda. 2018 jyldan beri Býrabaı baýraıyndaǵy balalardy saýyqtyrý ortalyqtaryna qajet­ti sý qubyrynyń qurylystary júr­gizilýde. Jumys kestesiniń artta qa­lýyna baılanysty bul jobalardyń kóp­shiligi búgingi tańda túzetýdi qajet etedi. Sebebi qurylysqa qajetti qury­lys materıaldary keıingi bes jyl ishinde aıtarlyqtaı qymbattap ketti. Merdiger kompanııalardyń shalaǵaı­lyǵynan salmaq bıýdjetke túsip jatyr. Ýaqytynda oryndalmaǵannan keıin osylaı bolatyny túsinikti. Tek kompanııa basshylarynyń halyqtyń qarajatyna jáne amalsyz sapasyz sý iship otyrǵanyna kóńil aýdarmaıtyny túsiniksiz.

Aqmola oblysy