Otandyq medısınanyń múmkindigi de, dárigerlerdiń biliktiligi de artyp keledi. Jergilikti dárigerler naýqastarǵa kúrdeli operasııany jedel jasaýǵa mashyqtandy.
Máselen, naýqastarǵa kúrdeli operasııa jasap júrgenderdiń qatarynda atyraýlyq dárigerler de bar. Oblystyq aýrýhanadaǵy gınekologııa bólimshesiniń meńgerýshisi Janargúl Bekenovanyń aıtýynsha, jyl basynda qabyldaý bólimshesine kelgen 53 jastaǵy áıel túsken.
«Sol kezde naýqas ishki aǵzasynyń aýyrǵany týraly shaǵym aıtty. Júregi aınyp, qusqan. Aǵzasynda álsizdik, bas aınalǵany baıqaldy. Jynys jolynan qan ketken. Bizdiń bólimshe dárigerleri naýqasty tolyq tekserýden ótkizdi. Onyń qorytyndysymen naýqasqa «Jatyrdyń alyp mıomasy. Túıin nekrozy, ortasha anemııa» dıagnozy qoıyldy», deıdi J.Bekenova.
Mıoma – jatyrdyń qaterli emes isigi. Biraq mundaı isikpen júrý qıyndyq týdyrady. Adam aǵzasyna keri áseri bar. Sol sebepten bólimshe meńgerýshisiniń jetekshiligimen gınekolog dárigerler Inkár Ondasynova men Maqsat Týǵanbaev naýqastyń jatyryna operasııa jasap, salmaǵy 8 kg mıomany alyp tastaǵan.
Al oblystyq onkologııa dıspanserinde qaterli isikke shaldyqqan 59 jastaǵy naýqasqa jasalǵan kúrdeli operasııa sátti aıaqtaldy. Dıspanser dırektory Elmıra Saparovanyń aıtýynsha, operasııaǵa deıin naýqasqa «retroperıtoneým sarkomasy» dıagnozyn qoıylǵan. Onkologııa dıspanserindegi kúrdeli operasııany hırýrgııa bóliminiń meńgerýshisi Maqsat Shámshenov pen oblystyq kardıoortalyqtyń qan tamyrlar hırýrgi Erlan Mádeshev jasady. Hırýrgterge assıstentter Mereı Qazǵalıev pen Maqsat Týǵanbaev, Meıramgúl Igibaeva, anestezıolog Alıakbar Imamatdınov kómektesti.
«Naýqasqa jasalǵan kúrdeli operasııa ortańǵy laparotomııa dep atalady. Hırýrgter anastomozdardy qoıý arqyly naýqastyń denesinen birneshe isikti alyp tastaǵan. Onyń ishinde syrtqy myqyn arterııasy men sol jaqtaǵy nesepaǵardyń tómengi úshten bir bóligin rezeksııalaý arqyly alynǵan úlken retroperıtonealdi isikter bar. Eń úlken isiktiń salmaǵy – 15 kg», deıdi E.Saparova.
Atyraý oblysy