Qazaqstan azamaty elden qolma-qol 33 mıllıon rýbl alyp ketpek boldy, dep habarlaıdy Egemen.kz.
UQK Shekara qyzmetiniń Qostanaı oblysy boıynsha departamenti habarlaǵandaı, 17 sáýirde «Qaıraq» avtokólik ótkizý beketinde «Toıota Land Krýzer» avtokóligin tekserý kezinde 33 mıllıon rýbl somasynda (404 858 dollar) qolma-qol aqsha tabylǵan. Avtokólikti Qazaqstan azamaty basqarǵan.
«Qazaqstan Respýblıkasy Prezıdentiniń 2022 jylǵy 14 naýryzdaǵy «Qazaqstan Respýblıkasynyń qarjylyq turaqtylyǵyn qamtamasyz etý jónindegi sharalar týraly» Jarlyǵyna sáıkes Qazaqstan Respýblıkasynan shetel valıýtasyn, altyn quımalary men monetalardy áketýge tyıym salyndy. Qazaqstan azamatynyń shetelge shyǵýyna ruqsat etilmedi. Bul fakti boıynsha tergeý jumystary júrgiziledi», delingen departament taratqan habarlamada.
Eske sala keteıik, buǵan deıin shekarashylar Qostanaı oblysyndaǵy «Qaıraq» baqylaý-ótkizý beketinde jalpy quny 11 mıllıon teńgeni quraıtyn temeki kontrabandasynyń jolyn kesken edi.