Almatyda, №29 balalar kitaphanasynda «Murat Áýezovpen ádebı qonaqjaı» atty kezdesý keshi ótti, dep habarlaıdy Egemen.kz.
Kezdesýdiń maqsaty Murat Muhtaruly Áýezovtiń ómiri men shyǵarmashylyǵyn óskeleń urpaqqa nasıhattaý. Onymen birge dańqty qazaq qaıratkeriniń urpaǵy Dıar Qonaev boldy.
Qalamgerdiń uly Murat Áýezovty el-jurty mádenıettanýshy-ǵalym, dıplomat, memleket jáne qoǵam qaıratkeri retinde tanyldy. Ol halqymyzdyń rýhanı mádenıetin damytýǵa, Ortalyq Azııa halyqtarynyń tarıhı-mádenı qundylyqtaryn zerdeleý men nasıhattaýǵa ólsheýsiz úles qosty.
«1949 jyly naýryz aıynda Almatyǵa keldik, sol jyly kúzde Almatydaǵy qazaq mektebine 1 synypqa bardym. 4 synypqa barǵanda orys mektepke aýysýǵa týra keldi. Ákem árip tanyǵan kúnnen bastap qazaq ádebıeti, tarıhymen tanysýyma den qoıdy. Qazaqtyń uly aqyny Maǵjan Jumabaev týraly men mektep qabyrǵasynda júrgen kezde ákem men anamnan estidim. Anam aqyn-jandy edi. Maǵjan, Ilııastar ustalyp ketken soń da olardyń shyǵarmalaryn kóziniń qarashyǵyndaı qorǵady, keshkisin bizge esik-terezeni jaýyp Maǵjannyń shyǵarmalaryn oqyp beretin edi», deıdi M. Áýezov.
Kishi Áýezovtyń tanymynda Muhtar Áýezov tek áke ǵana emes, uly ustaz. Tek halqynyń ǵana emes, balalaryna, otbasyna ustaz bola bildi.
«Ápkem Láılá Muhtarqyzy kórnekti tarıhshy ǵalym. Baýyrym Ernar qustyń qarashaǵyn zerttegen – dúnıe júzine ataǵy shyqqan úlken ǵalym-ornıtolog. О́zim de osal emespin. Máskeýde oqyǵanda mamandyqty tańdaǵanda ákem meni jolǵa salyp, bas kóz bolyp tileýshim boldy. О́te balajan edi. Ákemdi osy ýaqytqa deıin saǵynamyn» deıdi M. Áýezov.
Qazaq tilin jetik bilmeıtini týraly sóz etken Murat ózin «qazaq tiline oralǵan adammyn» dep sanaıtynyn aıtty. «Orystildi bolǵan kezimde de meniń júregim qazaq dep soqqan. Biraq ýaqyt óte ana tilimdi meńgerýdi jón sanadym. Qasymdaǵy dostarymyz bárimiz birigip tilimizdi úırenýge bel býyp, qaısymyz orys tilinde sóılep qoısaq, bes tıynnan ótemaqy tóleımiz dep kelistik. Solaı qazaq tiline orala bastadyq», deıdi qazaqtyń uly tulǵasynyń urpaǵy.