21 sáýirden bastap Mánshúk Mámetova atyndaǵy Oral halyqaralyq áýejaıynan Egıpetke ushý bastalady. Reıster jaz boıy júredi, dep habarlaıdy Egemen.kz.
Sharm-esh-Sheıh pen Oral shaharynyń arasyn Scat Airlines áýekompanııasy jalǵaıdy. Endi álemge tanymal kýrortqa Boeing 737MAX ushaǵymen Oral qalasynan bes kúnde bir ret ushýǵa bolady. Reıster qazan aıyna deıin josparlanǵan.
«Oral qalasynan shyǵatyn áýe reısterin kóbeıtý – biz kózdegen basym baǵyttyń biri. Biz óńir turǵyndaryna el ishinde suranysqa ıe baǵyttar boıynsha, sondaı-aq tanymal sheteldik kýrorttar boıynsha tikeleı reısterdiń qoljetimdi bolýyn kózdep otyrmyz. Egıpetke charterlik baǵdarlamanyń bastalýy bul máseleni sheshýdegi mańyzdy oqıǵa boldy», deıdi áýejaıdyń bas dırektory Rýstam Bektemirov.
Aıta keteıik, buǵan deıin Oral áýejaıy arqyly Astana-Oral-Maındaǵy Frankfýrt áýe reısteri 2017 jyldyń 14 maýsymynan beri aptasyna eki márte ushyp keledi. Al byltyr jazda Túrkııanyń Antalııa qalasyna maýsymdyq reıster qosylǵan bolatyn. Ol bıyl mamyr aıynda qaıta jalǵasady. Scat Airlines túrik kýrortyna aptasyna eki ret ushatyn charterlik baǵdarlamany bastaıdy.
«Oral qalasynan ushatyn týrlardy qazirdiń ózinde týroperatorlardan satyp alýǵa bolady», deıdi Aınagúl Saqposynova.