Depýtat Nartaı Aralbaıuly májiliste balalar arasyndaǵy álimjettik pen otbasydaǵy zorlyq-zombylyq máselesin kóterdi, dep habarlaıdy Egemen.kz.
Depýtat bundaı jaǵdaılarǵa qatysty shara qabyldap, aldyn alý kerek dep dabyl qaqty. Bul másele týraly memleket basshysy Qasym-Jomart Toqaev ta jıi aıtyp júr. Árbir azamattyń qaýipsiz qoǵamda ómir súrýi kezek kúttirmeıtin ózekti másele.
«Balalarǵa qatysty jantúrshigerlik qylmystar jıilep ketti. Mundaı oqıǵalar mektepte, kóshede, tipti úıde bolyp jatyr. Soraqy jaǵdaılar oqýshylardyń ózine qol jumsaýyna sebepker bolyp otyr. Tipti ata-analardyń ózderi balasyna qorlyq kórsetip, onyń arty qaıǵyly jaǵdaıǵa ulasyp jatady. Otbasyndaǵy zorlyq-zombylyqtyń aldyn alý jumysy álsiz. Jaýapty mekemeler men quqyq qorǵaý organdarynyń qyzmeti oıdaǵydaı nátıje bergen joq. Turmystyq zorlyq-zombylyqtyń aldyn alý saıasatyn qaıta qaraýymyz kerek dedi. Endeshe, bul máseleni dereý sheshetin kez keldi. Álimjettiktiń kóbeıýiniń bir sebebin mamandar pandemııa ýaqytynda onlaın oqyǵan oqýshylardyń keıin ortaǵa erkin beıimdelip kete almaýy. Qazir sonyń saldaryn kórip otyrmyz», deıdi Nartaı Aralbaıuly.
Sondaı-aq jantúrshiger qylmysty jasyrǵandarǵa da aýyr jaza qarastyrý usynyldy.
«Álimjettik faktilerin bile tura jasyryp qalǵan qyzmettegi azamattar da jazaǵa tartylýy kerek. Oǵan qosa balalardy qorlap jatqan kezde arasha túsýdiń ornyna sol áreketterdi beınetaspaǵa túsirip jarııalaǵan adamdardy da jazalaý qajet. Aıypty oqýshylardyń ata-analary da tıisti jazasyn alýy kerek», dedi ol.
Nartaı Aralbaıuly mekteptegi tártip pen tárbıege mán berý kerek deıdi. Muǵalimder de balaǵa tárbıe berýge jaýapty ekenin atap ótti. Ári bala tárbıelegeni úshin jeke shtat ashylyp, aılyq tólenýin surady.
«Mektepterde oqý men tárbıeniń birtutastyǵyn qamtamasyz etetin júıe qalyptasýy tıis. Árbir pánniń tárbıelik fýnksııasy, árbir muǵalimniń tárbıelik jaýapkershiligi bolýy tıis. Qazirgi jaǵdaıda Qazaqstan Respýblıkasy Úkimetiniń «Azamattyq qyzmetshilerge, memlekettik bıýdjet qarajaty esebinen ustalatyn uıymdardyń qyzmetkerlerine, qazynalyq kásiporyndardyń qyzmetkerlerine eńbekaqy tóleý júıesi týraly» №1193 qaýlysynyń 4-qosymshasynyń negizinde synyp jetekshilerge 1-4 synyptar úshin 8800 teńge (bazalyq laýazymdyq jalaqynyń 50 paıyzy), 5-11 synyptar men kolledjder úshin 10600 teńge (bazalyq laýazymdyq jalaqynyń 60 paıyzy) kóleminde qosymsha aqy belgilengen. Muǵalimderdiń sabaqta jáne sabaqtan tys ýaqytta balalardyń tárbıesimen júıeli aınalysýy úshin keıbir mamandandyrylǵan mektepterdegideı arnaıy kýrator shtattyq birligin barlyq mektepterge engizip, olardyń laıyqty aılyq jalaqysyn jáne statýsyn aıqyndaýyńyzdy suraımyz», dedi depýtat.