QR Oqý-aǵartý mınıstrligi oqýshylar arasyndaǵy qatygezdik pen buzaqylyqtyń aldyn alý maqsatynda ata-analardyń jaýapkershiligin kúsheıtýdi usynyp otyr, dep habarlaıdy Egemen.kz.
Májilis alańynda Oqý-aǵartý vıse-mınıstri Edil Ospanǵa «Bilim berý júıesinde baqylaýshy organdar kóp bolǵanymen, mektep oqýshylarynyń arasynda nege qatygezdik beleń alýda?» degen suraq qoıyldy.
«Buzaqylyqtyń artýyna áser etken áleýmettik qubylystar men faktorlar óte kóp. Bul boıynsha jumys isteımiz, túbegeıli sharalardy, zańnamalyq sharalardy, uıymdastyrýshylyq sharalardy, sonyń ishinde ata-ananyń jaýapkershiligin kúsheıtýdi, muǵalimderdiń jaýapkershiligin kúsheıtýdi qolǵa alamyz», dedi Edil Ospan jýrnalısterdiń saýaldaryna jaýap berip.
Vıse-mınıstr statıstıkalyq málimetterge súıenip, oqýshylar arasynda balalardy qorlaý men qatygezdik kórinisteri kóbeıgenin moıyndady.
«Statıstıka mundaı jaǵdaılardyń naqty óskenin kórsetip otyr, shuǵyl sharalar qabyldaý qajet. Osyndaı negizgi júıeli sharalardyń biri – mektepterdegi tárbıe jumysyn kúsheıtý. Biz osyndaı tujyrymdamany ázirleýdi bastadyq, mektepterde ata-analar akademııasyn qurý jumystaryn bastadyq, sonymen qatar ata-analardyń da moraldyq jaýapkershiligin kúsheıtemiz», dedi Edil Ospan.