Eńbek jáne halyqty áleýmettik qorǵaý mınıstrligi áleýmettik kodekske ózgerister engizbekshi. Zań jobasy ashyq talqylaýǵa usynyldy. Zań jobasy maquldansa, kásipker áıelderge dekrettik tólem alý úshin óz tabysynan zeınetaqy jarnalary men áleýmettik aýdarymdardy birdeı mólsherde tóleýge mindetteledi, dep habarlaıdy Egemen.kz Informbıýro baǵdarlamasyna silteme jasap.
Usynylyp jatqan zań jobasy qabyldansa, áleýmettik tólemder shemasyna 1 shildeden bastap ózgerister engiziledi.
Kásipker analardyń aıtýynsha, dekrettik tólem onsyz da 12 aıda tólep otyrǵan aqshamen shamalas boldy. Raıhan Kúngerbaeva tólem mólsherin tómendetetin bolsa, ár balaǵa tólenetin aqshany kóbeıtý kerek deıdi.
«Qansha soma quıasyń, túsetin qarjy somadan sál artyq bolady, shamamen 200 myń teńge shyǵar. Odan artyq alynbaıdy. Odan da dekrettik tólemdi jumys istep alǵan durys. Mysaly, meniń 5 qyzym bar. 5 qyzyma dál qazir 69 000 alamyn. Shyndyǵynda 69 myń teńge bir kúnge jetpeıdi. Múmkin shekteý qoıǵany da durys shyǵar. Qarjy basqasha bólinetin shyǵar dep oılaımyn», dedi kópbalaly kásipker ana.
Ekonomıst Lázzat Nurǵalıqyzy úkimet osyndaı shekteýler arqyly áleýmettik qordy syrttan keletin qarjynyń kóleminen emes ázirge halyqtyń qaltasynan toltyryp jatqanyn aıtady.
«Sońǵy 12 aıdyń mólsherinde eseptelinedi. Siz sol mıllıonnyń 10%-yn ózińizdiń áleýmettik memlekettik qorǵa aýdarýyńyz kerek. Al tap sonyń taǵy 10%-yn zeınetaqy qoryna aýdarsańyz, árıne, sizge keletin tabys mıllıon bolmaıdy, eki ese azaıýy múmkin. Aldynda 10%-yn tóleseńiz, endi 20%-yn tóıleısiz. Buryn mıllıon alatyn bolsańyz endi 500-600 myń bolyp azaıyp qalady», dedi Lázzat Nurǵalıqyzy.
Al qoǵam belsendisi Sábıt Rysbaı keıbir analar dekrettik tólemdi kóbirek alý úshin qýlyqqa baratynyn da atap ótti.
«Ýaqytsha, bala kótergennen keıin jeke kásipkerlik ashady. Odan keıin oǵan kóbirek aqsha quıady. Aılyqtaryn kóp qylyp kórsetedi. Al bul ortasha aılyqtyń ósýine alyp keledi. Kásipkerlerdiń de sanyn kóbeıtedi. Men ol nárseni durys dep kórmeımin», dedi ol.
Bıyl Qazaqstanda eń joǵarǵy dekrettik tólem 1 852 200 teńgeni quraǵan. Al respýblıka qazynasynan bala týǵanda beriletin bir jolǵy járdemaqy úshin 66 mıllıard, 1,5 jasqa deıingi bala kútimine tólenetin járdemaqyǵa 44 mıllard teńge bólindi.