Semeı qalasyndaǵy Shóje Qarjaýbaıuly atyndaǵy kósheniń boıynan alystan kóz tartatyn eńseli ári ádemi ǵımarat boı kóterdi. Bul – Álıhan Bókeıhan ýnıversıtetiniń stýdentteri úshin salynǵan erekshe úlgidegi jataqhana.
Byltyrǵy qyrkúıekte Abaı oblysyna barǵan saparynda Memleket basshysy Qasym-Jomart Toqaev «Semeı – ulttyq ǵylym men bilimniń, óner men mádenıettiń tarıhı ortalyǵy» degen bolatyn. Sondyqtan jańa jataqhananyń ashylýy óńirdiń eldiń damýyna serpin beretin qýatty aımaqqa aınalý jolyndaǵy alǵashqy qadamdarynyń biri dese de bolady. Sondaı-aq bul Prezıdenttiń «qaıta shańyraq kótergen oblystyń kórkeıýi úshin barlyq jaǵdaıdy jasaımyz» degen ýádesiniń oryndala bastaýynyń dálelindeı.
Shynynda da, joǵary bilimge talpynǵan talapty jastardyń jarqyn bolashaǵyna qanat bitiretin Stýdentter úıiniń ashylýy óńir ómirindegi eleýli oqıǵalardyń biri boldy. Ǵylym jáne joǵary bilim mınıstri Saıasat Nurbektiń ashylý saltanatyna arnaıy qatysyp, stýdenttermen kezdesýin de erekshe jaǵdaıǵa balar edik. Jańa jataqhanalardyń paıdalanýǵa berilýi – saladaǵy oń ózgeristerdiń bastamasy.
400 orynǵa shaqtalǵan Álıhan Bókeıhan ýnıversıtetiniń jańa «Stýdentter úıi» – hosteldik tıpte salynǵan zamanaýı stýdenttik baspana. Munda stýdentterge qajetti dúnıelerdiń barlyǵy eskerilgen. Bul bıyl 25 jyldyq mereıtoıy atalyp ótiletin ýnıversıtet úshin zor jetistik. Ýnıversıtettiń óz qarajatyna jataqhananyń (1,5 mlrd teńge) salynǵany da oqý ordasynyń zaman talabyna saı izdenisterge qol jetkizip kele jatqandyǵyn ańǵartsa kerek.
Qurylysy 2021 jyldyń kúzine bastalǵan 6 qabatty «Stýdentter úıiniń» jalpy aýdany – 6 myń sharshy metr. Munda 136 bólme bar. Jataqhana ǵımaraty barlyq zamanaýı talaptarǵa saı jabdyqtalǵan. Jaryq ári keń, qurylys barysynda yńǵaılylyq pen ekologııalylyq talaptardyń saqtalýyna da basa mán berilgen. Jatyn bólmelermen qatar, jastar baspanasy zamanaýı as úılerimen, kovorkıng-aımaqtarmen, medısınalyq kabınettermen, Wi-Fi jelisine qosylǵan kitaphanamen, fıtnes zalmen, kir jýatyn bólmemen jáne basqa da turmystyq, qosalqy jaılarmen jabdyqtalǵan.
– Jasyratyny joq, elimizdegi kóptegen oqý oryndarynda jataqhana jetispeıdi. Bul sońǵy jarty ǵasyr shamasynda kún tártibine shyqqan problema. Máselen, Qazaq ulttyq ýnıversıtetiniń janyndaǵy akademııalyq qalashyqtyń ózi 1974-1975 jyldary salynǵan. Aqtóbe ýnıversıtetine jataqhana salýǵa 1985 jyly ınvestısııa bólingen. Sodan beri eshqandaı oqý orny úshin stýdentter turatyn jańa jataqhana salynǵan emes. Al qazir Qazaqstanda demografııalyq dúmpý júrip jatyr. Jastar sany qarqyndy artyp keledi. Sońǵy úsh jylda 1,5 mln balanyń dúnıege kelýi – sonyń dáleli. Olardy týǵan sátinen bastap balabaqshamen qamtý, jaıly mektepterde bilim alýyna jaǵdaı jasaý, oqýǵa tússe, jataqhanaǵa ornalasýyna múmkindik berý sııaqty máseleler tolassyz týyndap otyrady. Oqý bitirse, mamandyǵyna saı jumys tabýy da qazirden oılandyratyny shyndyq. Semeıde jańa úlgidegi jataqhananyń paıdalanýǵa berilýi stýdentter úshin teńdessiz ıgilik ekeni anyq, – dedi Saıasat Nurbek.
Mınıstr sondaı-aq jastar úshin mamandyq tańdaýdyń mańyzy aıryqsha ekenin atap ótti. О́ıtkeni ǵalamdyq ózgeristerdiń jandanyp, tehnologııalardyń damı túsýi stýdent tańdaǵan mamandyqtyń qanshalyqty ómirsheń bolatynyna tıgizer áseri bar. Sol sebepti eńbek naryǵynda qandaı mamandyqtar transformasııaǵa ushyraıtyndyǵyn únemi qadaǵalap otyrý qajet.
– Qazaqstannyń keleshekte Qytaımen vızalyq shekteýlerdi alyp tastaýy da jastar qaýymyn qazirden oılantýǵa tıis. О́ıtkeni seriktestik maqsatta Qytaıdyń erkin baılanys ornatýy olardyń ozyq kompanııalarynyń, bıznes ortalyqtarynyń elimizdiń barlyq aımaǵyna kelýine jol ashady. Sol kezde aýdarmashy izdeýi, basqa da jumys oryndaryn ashýy múmkin. Qytaı tilin ıgerý qajettigi týyndaıtyndyqtan, qazirden bastap oqý oryndarynan Qytaıdy zertteý ortalyqtary ashylýǵa tıis, – dedi mınıstr.
S.Nurbek ýnıversıtet rektory Shyryn Qurmanbaevaǵa atalǵan usynysty jan-jaqty qarastyrý kerektigin eske saldy.
SEMEI