Premer-mınıstr Álıhan Smaıylovtyń tóraǵalyǵymen ótken Úkimet janyndaǵy otandyq kásipkerler keńesiniń otyrysynda adamı kapıtaldy damytýdyń ózekti máseleleri talqylandy, dep habarlaıdy Egemen.kz Úkimet basshysynyń baspasóz qyzmetine silteme jasap.
Oqý-aǵartý mınıstri Ǵanı Beısembaev osy baǵyt boıynsha balabaqshalarda 300 myń jańa oryn ashý, bilim berý júıesindegi jańashyldyqtyń – 1000 kóshbasshysy kadrlyq rezervin qurý, mektepterde 7 myń pándik kabınet ashý, 100 qosymsha bilim berý obektisin salý, kolledjderdegi memlekettik tapsyrysty 150 myń orynǵa deıin ulǵaıtý, 100 bıznes-ınkýbator qurý jáne t. b. sharalardyń josparlanǵanyn habarlady.
Ǵylym jáne joǵary bilim mınıstri Saıasat Nurbek joǵary oqý oryndarynyń bilim berý baǵdarlamasyn jańartý, óńirlik kadrlyq qajettilik kartasyn jasaý, ǵylymı qyzmet nátıjelerin kommersııalandyrý boıynsha júrgizilip jatqan jumystarǵa toqtaldy. Eńbek jáne halyqty áleýmettik qorǵaý mınıstri Tamara Dúısenova Ulttyq biliktilik júıesin damytý sharalary týraly aıtty. Bilim berý baǵdarlamalarynyń negizi bolyp tabylatyn kásiptik standarttardy ázirleýge jumys berýshilerdiń qatysýy qajet dep atap ótildi. Sonymen qatar ásirese, jastardyń jumysqa ornalasýyna kedergilerdi joıýǵa baǵyttalǵan táýelsiz sertıfıkattaýdy engizýge nazar aýdaryldy.
Jıynǵa qatysýshylar ekonomıka salalaryna kadr daıarlaý, túlekterdi jumysqa ornalastyrý, dýaldy oqytý, kásibı standarttardy ázirleý, ǵylymı-zertteý jáne tájirıbelik-konstrýktorlyq jumystardy (ǴZTKJ) qarjylandyrý, salyq tóleýge yntalandyrý, jeke menshik mektepter men mektepke deıingi bilim berý uıymdaryn damytý, ınjenerlik qyzmet jáne basqa da máselelerdi jan-jaqty talqylady.
Premer-mınıstr ekonomıka qajettilikteri úshin maman daıarlaý Úkimettiń basym mindetteriniń biri ekenin atap ótti. Osyǵan baılanysty azamattar men bıznestiń belsendi qatysýymen ekonomıkanyń naqty qajettilikterine nazar aýdara otyryp, bilim berý júıesin jetildirý jáne jaqsartý boıynsha jumystardy jalǵastyrý qajet.
«Bilim berý granttaryn jáne basqa da damytý sharalaryn aldyn ala qarastyrý úshin eńbek naryǵyn zertteýge jáne 5-7 jyldan keıin ekonomıkaǵa qandaı kadrlar qajet bolatynyn boljaýǵa kóńil bólý qajet. Bul tek joǵary oqý oryndaryna ǵana emes, kolledjder men basqa da bilim berý uıymdaryna qatysty. Bilim berý baǵdarlamalary naryq suranysyna saı bolýy tıis», dedi Álıhan Smaıylov.
Keńes qorytyndysy boıynsha Premer-mınıstr Oqý-aǵartý, Ǵylym jáne joǵary bilim, Eńbek jáne halyqty áleýmettik qorǵaý mınıstrlikterine aıtylǵan barlyq usynysty jumys barysynda nazarǵa alýdy jáne «Atameken» ulttyq palatasymen birlese, kóterilgen máselelerdi sheshý joldaryn qarastyrýdy tapsyrdy.
Is-sharaǵa ortalyq memlekettik organdardyń, «Atameken» ulttyq kásipkerler palatasynyń, Qazaqstannyń úzdiksiz bilim berý qaýymdastyǵynyń, «Eýrazııalyq top» JShS-niń jáne basqa da salalyq uıymdar basshylary qatysty.