Qazaqstan azamattaryn Efıopııa men Saýd Arabııasy Koroldiginiń aýmaǵy arqyly evakýasııalaý jumystary jalǵasyp jatyr, dep habarlaıdy Egemen.kz.
Sýdandaǵy jaǵdaı áli de shıelenisip tur. 15 sáýirde Sýdannyń Ulttyq qorǵanys kúshteri men Jedel áreket etý kúshteri arasynda qarýly qaqtyǵys bastaldy. Qazir Hartým qalasynda jáne eldiń basqa aımaqtarynda soǵys qımyldary jalǵasyp jatyr. Qaqtyǵys taraptary jarııalaǵan úsh kúndik gýmanıtarlyq bitim qaıta-qaıta buzylýda.
Sýdandaǵy soǵys qımyldary bastalǵan sátten bastap Qazaqstan Respýblıkasynyń Efıopııadaǵy elshiligi qazaqstandyq azamattardy qaqtyǵys aımaǵynan evakýasııalaý máselesin barynsha pysyqtaýǵa kiristi.
Efıopııada tirkelgen birqatar elshilik pen halyqaralyq uıymdardyń ókilderimen kezdesýler ótkizilip, olarǵa Qazaqstan Respýblıkasynyń azamattaryn Sýdannan evakýasııalaýǵa kómektesý úshin resmı ótinishter jiberildi.
«Búgingi tańda Qazaqstannyń birqatar azamaty qaqtyǵys aımaǵynan evakýasııalandy. Qazaqstan azamattaryn Efıopııa men Saýd Arabııasy Koroldiginiń aýmaǵy arqyly evakýasııalaý jumystary jalǵasyp jatyr. Efıopııadaǵy Qazaqstan elshiligi azamattarymyzdy Sýdannan kelisilgen jáne qaýipsiz shyǵarý úshin Mysyrdaǵy jáne Saýd Arabııadaǵy QR dıplomatııalyq ókildikterimen tyǵyz baılanysta», delingen Syrtqy ister mınıstrliginiń habarlamasynda.
Qazaqstan azamattarynyń naqty sanyn anyqtaý jáne olarǵa Sýdannan evakýasııalaýǵa járdem kórsetý úshin elshilik janynan jedel jeli ashyldy: +251 945 051 624 (WhatsApp), kazembethiopia@gmail.com, kazembethiopia@mfa.kz.
Elshilik Efıopııa Syrtqy ister mınıstrligine, BUU-nyń Sýdan men Efıopııadaǵy bólimshelerine, sondaı-aq Túrkııa, Reseı jáne Japonııa elshilikterine Qazaqstan azamattaryn evakýasııalaýǵa belsendi kómek kórsetkeni úshin alǵys bildirdi.