«Manchester Sıtı» shabýylshysy, norvegııalyq Erlıng Holand Aǵylshyn premer-lıgasynda rekord jasady, dep habarlaıdy Egemen.kz QazAqparat agenttigine silteme jasap.
Premer-lıganyń 33-týrynda «Manchester Sıtı» óz alańynda basty qarsylasy, chempıondyqtan úmitker Londonnyń «Arsenalyn» qabyldap, 4:1 esebimen jeńiske jetti.
Matchtyń núktesin 95-mınýtta E.Holand qoıdy. Bul onyń Anglııa chempıonatynda osy maýsymdaǵy 33-inshi goly edi.
Sóıtip ol «Lıverpýl» shabýylshysy, mysyrlyq Mohamed Salahtyń 2017-2018 jylǵy maýsymdaǵy rekordtyq kórsetkishinen (32) asyp tústi.
Anglııa lıgasynyń absolıýttik rekordy (34 gol) Endı Koýl («Nıýkasl», 1993-1994) jáne Alan Shırerge («Blekbern», 1994-1995) tıesili.
Alaıda bul kórsetkishke olar 42 matchtyq maýsymda (qazir Anglııa chempıonaty 38 týrdan turady) qol jetkizgen edi.
E.Holand bıylǵy mergender kóshin bastap keledi. «Tottenhem» shabýylshysy Garrı Keınniń enshisinde 24 dop bar.
Norvegııalyq shabýylshy osy maýsymda «Manchester Sıtı» sapynda barlyq jarysta 43 oıynda 49 gol soǵyp, 8 nátıjeli pas berdi.
Anglııa premer-lıgasynda «Arsenal» 33 matchtan keıin 75 upaı jınap, ázirge kósh basynda tur. Áıtse de ekinshi oryndaǵy «Manchester Sıtı» (73 upaı) eki matchty kem ótkizdi.
О́zara básekede «Arsenaldy» jeńgennen keıin Hosep Gvardıola shákirtteriniń chempıondyqqa degen múmkindigi arta tústi.
Sonymen qatar «Manchester Sıtı» Chempıondar lıgasyn jeńip alýdan da úmitti.
Aǵylshyn klýby jartylaı fınalda 9-ynshy jáne 17 mamyrda Madrıdtiń «Realymen» sheberlik baıqasady.