Fransııanyń Anje qalasynda uıymdastyrylǵan shaıbaly hokkeıden jasóspirimder arasyndaǵy birinshi A dıvızıonynyń álem chempıonaty aıaqtaldy. Baıraqty dodada óner kórsetken jerlesterimiz Qazaqstan jankúıerlerin qýantyp, 20 jyldan keıin alǵash ret jahandyq dodanyń elıtaly kezeńine joldama aldy.
Sergeı Starygın shákirtteri chempıonattaǵy sońǵy, sheshýshi týr oıynyn Fransııa quramasymen ótkizdi. Muzaıdyn ıeleri óz jankúıerleriniń qoldaýy astynda oınasa da, jerlesterimizge qarsy esh dármen kórsete almady. Nátıjesinde, Qazaqstan quramasy 6:1 esebimen jeńiske jetip, álem chempıonatynyń joǵary tobyna joldama aldy. Bul oıynda Qazaqstan quramasy sapynan Aleksandr Mıgýnov, Nıkıta Sıtnıkov, Beıbarys Orazov, Dáýlet Núrkenov jáne Egor Levkoves mergendigimen kózge tússe, muzaıdyn ıelerinen Orelen Serres dáldik tanytty.
Osylaısha, bes matchtyń tórteýinde jeńiske jetip, bireýinde qarsylastaryna jol bergen Qazaqstannyń jasóspirimder quramasy týrnır kestesinde 12 upaımen kósh bastap, kelesi jyly ótetin álem chempıonatynyń elıtaly kezeńinde baq synaý múmkindigine ıe boldy.
Chempıonat qorytyndysy boıynsha, Qazaqstan quramasynyń qaqpashysy – Vladımır Nıkıtın birinshiliktiń úzdik qaqpashysy dep tanyldy. Ol úsh matchta qaqpasyna birde-bir shaıba ótkizbeı, soqqy qaıtarý boıynsha da úzdik shyqty – 93,64%.