Ulttyq banktiń Aqsha-kredıt saıasaty komıteti bazalyq mólsherlemeni +/- 1 p.t. dálizimen jyldyq 17,00% deńgeıinde belgileý týraly sheshim qabyldady. Bul sheshim kezekti boljamdy raýndtyń nátıjesine, negizgi makroekonomıkalyq kórsetkishter men ınflıasııa táýekelderi teńgeriminiń jańartylǵan baǵalaýyna súıenip qabyldandy, dep habarlaıdy Egemen.kz Ulttyq banktiń baspasóz qyzmetine silteme jasap.
Jyldyq ınflıasııanyń baıaýlaý úrdisi jalǵasyp keledi. О́tken jylǵy qyrkúıektegi eń joǵary mán – 12,9%-dan 2,5 paıyzdyq tarmaqqa tómendep, bıylǵy mamyr aıynyń qorytyndysy boıynsha 10,4% boldy.
Azyq-túlik ınflıasııasy 10,7%-ǵa deıin tómendedi. Buǵan jemis-jıdek pen kókónis, áleýmettik mańyzy bar azyq-túlik taýarlary men jekelegen ımporttyq taýarlar baǵasy ósiminiń baıaýlaýy sebep boldy.
Azyq-túlikke jatpaıtyn ınflıasııanyń ósý qarqyny (11,7%) burynǵy deńgeıinde saqtaldy. Bul baǵytqa teńge baǵamynyń nyǵaıýy men tutynýshylyq kredıtteýdiń báseńdeýi saldarynan suranystyń turaqtaný belgileri áser etti.
Kórsetiletin qyzmetter baǵasynyń ósýi de suranystyń turaqtanýy men turǵyn úı-kommýnaldyq qyzmet tarıfteri ósiminiń báseńdeýinen baıaýlap, 8,7%-dy qurady.
Mamyr aıynda aılyq ınflıasııa 0,7%-ǵa deıin baıaýlady (sáýirde – 0,8%). Bazalyq jáne maýsymdyq faktorlar eskerilmegen ınflıasııa da 0,7%-ǵa deıin tómendedi.
Tabysynan 8 ese kóp qaryzy barlarǵa nesıe berilmeıdi: Ulttyq bank jańa shekteý engizedi
Halyqtyń aldaǵy bir jylǵa arnalǵan ınflıasııalyq kútýleri mamyrda 12,7% boldy. Sońǵy eki aıda bul kórsetkish 12,4-12,7% aralyǵynda qalyptasty. Al ótken jyldyń ortasynan beri ol turaqty túrde 13-14%-dan joǵary bolǵan edi. Qazirgi kútýlerdiń edáýir bóligi retteletin baǵalar reformasynyń yqpalymen qalyptasyp otyr. Al, naryqqa kásibı qatysýshylardyń 2026 jyldyń sońyna qaraı ınflıasııa boıynsha kútýleri 10,0% deńgeıinde ózgerissiz qaldy.
Azyq-túliktiń álemdik baǵasy – ósimdik maıy, et jáne dándi daqyldardyń qymbattaýy esebinen birqalypty ósip jatyr, al qant pen sút ónimderiniń baǵasy tómendep otyr.
Reseı Federasııasynda da ınflıasııanyń baıaýlaý belgileri baıqalady. EO men AQSh-ta energııa kózderi baǵasynyń joǵary saqtalýyna baılanysty dezınflıasııa prosesi toqtap qaldy. Osyǵan oraı, jetekshi ortalyq bankter aqsha-kredıt saıasatyn saqtyqpen júrgizip otyr jáne ony kez kelgen ýaqytta túzetýge daıyn ekenin baıqatty.
Jańartylǵan bazalyq ssenarıı aıasynda aldyńǵy boljamdarmen salystyrǵanda, osy jyldyń sońyna deıin Brent markaly munaıdyń baǵasy neǵurlym joǵary deńgeı – 1 barrel úshin 90 dollar kóleminde bolady dep boljanady. Munaı baǵasynyń mundaı dınamıkasy Taıaý Shyǵystaǵy geosaıası shıelenistiń áserinen qalyptasyp otyr. Boljam boıynsha baǵa birtindep tómendep, 2027 jyly barreline 75 dollardy, al 2028 jyly 65 dollardy quramaq.
2026 jylǵa arnalǵan ınflıasııa boljamy 9-11%-ǵa deıin (buǵan deıin 9,5-11,5%) tómendeý jaǵyna qaraı qaıta qaraldy. Buǵan baǵa ósiminiń is júzinde tez baıaýlaýy, QQS kóterilýiniń baǵaǵa shekteýli áseri, sondaı-aq teńge baǵamynyń nyǵaıýy birden-bir sebep boldy.
Ulttyq bank bıyl ınflıasııanyń bir mándi deńgeıge tómendeýin kútedi. Buǵan ustamdy qatań aqsha-kredıt sharttary men Úkimetpen birlesip atqarylyp jatqan makroekonomıkalyq turaqtylyqty qamtamasyz etý sharalary septigin tıgizedi. Boljam boıynsha, 2027 jyly ınflıasııa 5,5-7,5%-ǵa deıin baıaýlaıdy, al 2028 jyly 5%-dyq nysanaly kórsetkishke deıin turaqtanady. Ol syrtqy ınflıasııalyq jaǵdaıdyń qalypqa kelýine, ınflıasııalyq kútýlerdiń tómendeýine, kvazıfıskaldyq yntalandyrýdyń jáne fıskaldyq shoǵyrlandyrýdyń azaıýy aıasynda bolady.
2027 jyldan bastap azamattardyń qaryz kólemine shekteý engizilýi múmkin
Inflıasııa táýekelderiniń proınflıasııalyq baǵytqa qaraı yǵysý dárejesi tómendedi. Birinshi jartyjyldyqtaǵy birqalypty ishki suranys pen teńgeniń nyǵaıýyna yqpal etken qolaıly syrtqy konıýnktýra jınaqtalǵan proınflıasııalyq qysymdy ishinara teńestirdi.
Ishki táýekelder: Kvazıfıskaldyq yntalandyrý aıasynda suranystyń jedel ósýi, aqsha agregattarynyń keńeıýi, qubylmaly ınflıasııalyq kútýler, sondaı-aq TKQ tarıfteri men JJM baǵalaryn reformalaý parametrleriniń naqty iske asýy.
Syrtqy táýekelder: Syrtqy ınflıasııalyq qysymdy kúsheıtetin jáne álemdik naryqtaǵy qubylmalylyqty arttyratyn geosaıası shıelenister.
2026 jylǵa arnalǵan IJО́-niń ósý boljamy jaqsaryp, 4,5-5,5% aralyǵynda baǵalandy. Boljam naqty ekonomıkalyq belsendiliktiń joǵarylaýy men munaı baǵasyndaǵy alǵysharttardyń jaqsarýyna baılanysty qaıta qaraldy. 2027-2028 jyldary JIО́ ósimi 3,5-4,5% deńgeıinde bolady dep kútiledi. Ortamerzimdi keleshekte ekonomıkadaǵy ósim ishki suranystyń neǵurlym teńgerimdi dınamıkasy men munaı baǵasynyń tómendeýi jaǵdaıynda qalyptasady.
Qol jetkizilgen ınflıasııanyń baıaýlaýy men boljamdardyń jaqsarýyna baılanysty osy otyrysta bazalyq mólsherlemeni tómendetý múmkindigi qalyptasty. Sonymen birge, bıyl ınflıasııanyń bir mándi kórsetkishke deıin tómendeýin qamtamasyz etý jáne ortamerzimdi keleshektegi maqsatqa qol jetkizý úshin aqsha-kredıt sharttarynyń ustamdy qatańdyǵyn saqtaý qajet. Budan keıingi sheshimder ınflıasııanyń naqty traektorııasyna, ishki suranys dınamıkasyna, fıskaldyq parametrlerdiń oryndalýyna jáne kvazıfıskaldyq yntalandyrýdyń áserine súıene otyryp qabyldanady.
Qabyldanǵan sheshimge túrtki bolǵan faktorlar men boljamdar týraly tolyq aqparat 2026 jylǵy 10 maýsymda Ulttyq banktiń resmı ınternet-resýrsynda jarııalanatyn Aqsha-kredıt saıasaty týraly baıandamada beriledi. Ulttyq banktiń Aqsha-kredıt saıasaty komıtetiniń bazalyq mólsherleme boıynsha kezekti josparly sheshimi 2026 jylǵy 24 shildede Astana qalasynyń ýaqytymen saǵat 12:00-de jarııalanady.
Buǵan deıin Qasym-Jomart Toqaev Ulttyq bank basshylyǵynyń 2025 jyly atqarǵan jumys qorytyndysy men 2026 jylǵa arnalǵan jospary týraly esebin tyńdady.