Anastasııanyń armany

Elimizge qonys aýdar­ǵan­­dar­dyń biri – Anastasııa Evsee­­va. Ol 2012 jyly kór­shi­les Reseıden Shymkent qala­sy­na kóship kelipti. On bir jyldyń ishinde ıakýt qyzy qazaqtyń salt-dástúrin, tilin de jetik meńgerip alǵan.

– Búginde qushaǵy keń qazaq kóp­tegen ulysty óz mańyna uıys­tyryp otyr. Meni de jatsynbady. Alǵash kelgen kezimnen baýyryna bas­ty. Qazaq – tálimi mol salt-dástúr men mádenıetke baı halyq. Sankt-Peterbýrgte oqyǵanymda qazaq dıasporasymen jaqsy aralastym, túrli is-sharalaryna belsendi qatystym. Jyl saıyn naýryz meıramyn birge toılaımyz. Ulttyq taǵam et, baýyrsaq ázirlep, bir­­ge qa­zaqsha ánder aıtatynbyz. Osy­dan keıin Qazaqstanǵa bir kúni baramyn dep maqsat tut­tym. Sóıtip, oqýymdy aıaq­taı sala oılanbastan armanymdy júzege asyrdym. Alǵash Shym­kent qalasynda turdym. Iаkýt hal­qynyń as daıyndaý mázi­rin­de uqsastyq kóp. Má­se­len, biz baýyrsaqqa uqsas quımaq pisiremiz. Qymyzdy ıakýttar da súısinip ishedi. Tilimizde de asa aıyrmashylyq joq dep oılaımyn. Mysaly, qazaq tilindegi «bar», «kel» sııaqty sózder maǵynasy men aıtylýy jaǵynan birdeı. Sodan bolar, qazaq tilin esh qıyndyqsyz meńgerip aldym. Ári ońtústik óńir taza qazaqı orta ǵoı. Sóıtip, 2017 jyly jýrnalıst qurbym Álııa Talasova oblystyq «Aqtóbe» telearnasyna jumysqa shaqyrdy. Sol sátten beri Aqtóbe qutty qonysyma aınaldy, turaqtap qaldym. Munda jańalyqtar bóliminde tilshi, dıktor jáne taqyryptyq baǵdarlamalar júr­gizýshisi bolyp jumys iste­dim, – dedi A.Evseeva.

Telearnada bilimi men biligin shyńdaǵan ıakýt qyzy qazir Aq­tó­be jurtshylyǵyna jaqsy tanys. Qat-qabat jumystarymen qatar, ol qoǵamdyq mádenı is-shara­larǵa atsalysýdan da tar­tyn­ǵan emes.

– Ýaqyt ótken saıyn Qazaq­stan­ǵa óz elimdeı baýyr basyp qaldym. Ultym ózge bolsa da, janym – qazaq. Meniń bul jaqta óz ortam, qoldaýshy jana­shyr jaqyndarym bar. Son­dyqtan osy eldiń damýyna óz úlesimdi qosqym keledi. Máselen, qazir áleýmettik jeli­niń damyǵan zamany ǵoı, YouTube-ten arna ashýdy jos­par­lap júrmin. Qazaqstandy ózge ulttyń kózimen álemge tanys­tyr­ǵym keledi. Tipti Reseı­degi ózimniń dostarym men týystarym da Qazaq eli týraly tereńirek bilýge qumartady. Buǵan qosa birneshe jyl boıy men Ekaterına Golotınanyń jetekshiligimen «Dobro», «Zello help» jáne «Antıkovıd 19» eriktiler qozǵalystarynyń eń úzdik komandasynyń quramynda volonter boldym. Sońǵy úsh jylda biz 15 myńnan astam ot­ba­syna áleýmettik kómek kórsettik. Bul da qazaq baýyrlaryma degen shyn júrekten jasap júrgen kómegim, – dedi ıakýt qyzy.

Sonaý qıyn-qystaý zamanda elimizde taban tirep, kıeli mekennen pana tapqan túrli dıas­pora ókilderi bul kúnde aýyz­birshilikpen tatý-tátti ǵu­myr keship jatyr. Qazir olardyń qa­taryna qazaqtyń salt-dástúri men mádenıetin jatsynbaı qabyldaǵan Anastasııa Evseeva syndy jastar da kelip qosyldy.