Memlekettik qyzmet isteri agenttigi tóraǵasy mindetin atqarýshy Salaýat Múksimov memlekettik laýazymǵa úmitkerlerge qazaq tilin bilý talaby qoıylmaı júrgenin aıtty, dep habarlaıdy Egemen.kz.
Salaýat Múksimovtiń aıtýynsha, bundaı talap zań boıynsha rettelmegen. Memlekettik qyzmetke qazaq tilin bilmese de esh kedergisiz jumysqa kirýge bolady.
«Memlekettik qyzmet isteri agenttigi óz quzyreti aıasynda memlekettik tildi damytý jumystaryn únemi júrgizýde. Qazirgi ýaqytta memlekettik laýazymdarǵa úmitkerler úshin memlekettik tildi meńgerý deńgeıi boıynsha talap joq. Bul másele zańnamalyq deńgeıde rettelmegen. Atap aıtqanda, Konstıtýsııanyń 7-babyna sáıkes Qazaqstan Respýblıkasynda qazaq tili memlekettik til. Memlekettik uıymdar men jergilikti ózin-ózi basqarý organdarynda qazaq tilimen teń dárejede orys tili resmı túrde qoldanylady. Konstıtýsııanyń 14-babynda eshkimdi shyǵý tegine, áleýmettik, laýazymdyq jáne múliktik jaǵdaıyna, jynysyna, násiline, ultyna, tiline, dinge kózqarasyna, nanymyna, turǵylyqty jerine baılanysty nemese kez kelgen basqa mán-jaılar boıynsha kemsitýge bolmaıtyndyǵy kórsetilgen. Konstıtýsııanyń 14-babynda kózdelgen quqyqtar men bostandyqtar eshbir jaǵdaıda shektelýge jatpaıdy», dedi ol depýttardyń saýalyna bergen jaýabynda.
Alaıda, ol qazaq tilin bilý talabyn engizý boıynsha jumystar atqarylyp jatqynyn aıtty.
«Osyǵan qaramastan agenttik memlekettik qyzmette memlekettik tildiń aıasyn keńeıtý maqsatynda keshendi sharalardy júzege asyrýda. Atap aıtqanda, 2021 jyly ótkizilgen Prezıdenttik jastar kadr rezervine irikteýde úmitkerlerge memlekettik tildi kem degende orta deńgeıde (V1) meńgerý talaby engizildi. Bul rette, osy jyly úshinshi ret uıymdastyrylýy josparlanyp otyrǵan Prezıdenttik jastar kadr rezervine irikteý kezinde de memlekettik tildi bilý negizgi talap retinde bekitildi. Sonymen qatar, 2022 jyldan bastap QR Prezıdenti janyndaǵy Memlekettik basqarý akademııasyna joǵary oqýdan keıingi bilim alýshy úmitkerlerge memlekettik tildi orta deńgeıden (V1) tómen emes bilýi boıynsha sertıfıkattarynyń bolýy týraly talap engizildi», dedi Salaýat Múksimov.