2022 jyldyń qorytyndysy boıynsha elimizde halyqty sýmen qamtamasyz etý kórsetkishi qalalarda – 98,4, aýyldy jerlerde 94,5%-ǵa jetken. Bul týraly Ortalyq kommýnıkasııalar qyzmetinde ótken brıfıngte Indýstrııa jáne ınfraqurylymdyq damý mınıstrligi Qurylys jáne turǵyn úı-kommýnaldyq sharýashylyq isteri komıteti tóraǵasynyń orynbasary Ázimbek Pazylbekuly aıtty.
Vedomstvo ókili halyqty sýmen qamtamasyz etý jumystary týraly aıta kele alda atqarylatyn mindetterge de toqtaldy. Spıkerdiń sózine sensek, Soltústik Qazaqstan, Mańǵystaý, Atyraý, Jetisý, Batys Qazaqstan, Qyzylorda oblystarynyń halqy (qalalarda) sýmen 100% qamtylǵan.
– Al eń tómengi deńgeı Jambyl (91,9%), Qostanaı (80,4%), Aqmola (89,8%) jáne Soltústik Qazaqstan oblystarynyń (85%) qalalarynda baıqalyp otyrǵanyn aıta ketken jón. Osyǵan baılanysty bul aımaqtarda sýmen qamtý jumystaryn jaqsartý úshin qajetti qarajatty bólý qarastyrylmaq, – deıdi ol.
Ázimbek Pazylbekulynyń aıtýynsha, sýdy kommersııalyq jáne tehnıkalyq maqsatta únemdep, apatty jáne ınvestısııalyq shyǵyndardy azaıtý úshin respýblıkalyq bıýdjet esebinen sý arnalaryn avtomattandyrý jobalaryn qarjylandyrý josparlanǵan. Atap aıtqanda, jelilerdegi sýdyń turaqty qysymyn retteý úshin sorǵy stansalaryn modeldep, basqarýǵa múmkindik beretin barlyq óndiristik úrdiske baılanysty sý resýrstaryn esepke alýdyń tolyq keshenin qamtamasyz etý kózdelgen. Bul sýmen qamtý jáne sý qubyry júıesin jańǵyrtýǵa arnalǵan shyǵyndardy azaıtýǵa septigin tıgizedi.
Buǵan qosa vedomstvo ókili mınıstrliktiń aýyz sýdy arzandatýǵa baǵyttalǵan jumystary jóninde aıtty. Máselen, Sý kodeksine sáıkes memlekettik mańyzdy topqa jatatyn jáne derbes jergilikti sýmen qamtý júıeleri arqyly taratylatyn taza sý qyzmetteriniń qunyn ishinara sýbsıdııalaıdy. Iаǵnı jergilikti atqarýshy organdar óńirdiń áleýmettik-ekonomıkalyq damýy men tarıfterine saı 1 tekshe metr aýyz sýdyń baǵasyn belgileıdi. Osy arqyly tarıf pen tólem kólemi arasyndaǵy aıyrmashylyqty memleket sýbsıdııa berý arqyly retteıdi.
– Alaıda elimizde qajetti esepteý qurylǵylary bolǵan jaǵdaıda bir adamǵa sýbsıdııalaýdyń normatıvtik shekteýi (Qurylys normalary men erejelerine (QNjE) sáıkes táýligine 140 lıtrge deıin) belgilengenin eskergen jón. Bul tirshilik nárine únemdep qaraýǵa baǵyttalǵan amal bolyp otyr. Al sýdy tutyný kólemi belgilengen normadan asyp ketken jaǵdaıda kez kelgen azamat onyń aqysyn tarıf boıynsha tolyq tóleýge tıis, – deıdi vedomstvo ókili.