Qazaqstan Respýblıkasy Ulttyq mýzeıinde Alpysbaı Qazǵulovqa arnalǵan mereıtoılyq dóńgelek ústel jáne sýretshiniń jeke «Kóktemgi samǵaý» kórmesi ótti, dep habarlaıdy Egemen.kz.
Dóńgelek ústelde «Alpysbaı Qazǵulovtyń shyǵarmashylyǵy. Jańashyldyq jáne avtorlyq ádistiń biregeıligi», «Qazirgi qazaq beıneleý óneriniń ahýaly jáne onyń baǵyttary men aǵymdary», «Qazaqstandaǵy art-rynoktyń qalyptasýyndaǵy ózekti máseleler» taqyryptary talqylanady. Oǵan sýretshiler men ónertanýshylar qatysady. Sonymen qatar sýretshiniń shyǵarmashylyǵy týraly kitap, kartınalary bar posterler tanystyrylady.
«Kóktemgi samǵaý» kórmesinde ýaqyt baılanysy, babalardyń rýhanı murasy, kóshpendiler álemi, dala men aýyl fılosofııasy, qazaq ádet-ǵurpynyń sabaqtastyǵy, áıel sulýlyǵyna tánti bolý syndy onyń shyǵarmashylyǵyn nasıhattaıtyn týyndylar qoıylǵan. Alpysbaı Qazyǵulov óz sýretteri arqyly halyqtyń qıyndyqtardy jeńe otyryp, jarqyn ómirge qalaı bara jatqany týraly aıtýǵa tyrysady. Ol otyz jyldyń ishinde jeti myńnan astam kartınalar saldy, olardyń basym bóligi Eýropa, Azııa, Amerıkanyń galereıalary men jeke kolleksııalaryna tarap ketken. Sonymen qatar sýretshi óz kolleksııasyna qazaqstandyq jáne reseılik avtorlardyń 2000-nan astam keskindeme, grafıka jáne músin úlgilerin jınady. Onyń shyǵarmashylyq týyndylary elordalyq zamanaýı óner mýzeıiniń, Prezıdenttik mádenı ortalyqtyń, Qasteev atyndaǵy Memlekettik óner mýzeıiniń, QR Ulttyq mýzeıiniń kórkemsýret qoryn birneshe ret tolyqtyrdy. Onyń shyǵarmashylyǵyn qasterleýshiler - Laıma Vaıkýle, Dıde Marýanı, Jerar Deparde, Patrısııa Kaas, Belgııa knıazi Loran jáne taǵy basqalar.
Kolleksıoner Qazǵulovtyń kórkemsýret muraǵatynda Ábilhan Qasteev, Jańataı Shardenov, Salıhıtdın Aıtbaev, Vladımır Eıfert, Kım Kýznesova syndy ataqty sýretshilerdiń jáne basqa klassıkterdiń týyndylary saqtalýda.
Búgingi tańda bul sýretshi Qazaqtandaǵy jáne respýblıkadan tysqary jerlerdegi eń suranysqa ıe sýretshilerdiń biri. Onyń kórmeleri Belgııada, Qytaıda, Túrkııada, Ulybrıtanııada, Reseıde, Japonııada, Nıderlandyda ótti. Endi Álem onyń kózimen bizdiń elimizdi kórip otyr. Sýretshi «Parasat» ordeni jáne Masarık atyndaǵy altyn medal ıegeri.