Ońtústik Koreıanyń Chondjý qalasynda jalaýy jelbiregen aýyr atletıkadan Azııa chempıonatynyń alǵashqy kúninde el qorjynyna alǵashqy júlde tústi.
55 kılo salmaq dárejesinde baq synaǵan Arlı Chonteı bıylǵy sary qurlyq dodasynda eki Vetnam sportshysyn alǵa jiberip, qola júldeger atandy. Qazaqstan aýyr atleti julqa kóterýde 117 kılomen alǵashqy baǵdarlamada kósh bastaǵanymen, serpe kóterý jattyǵýynda 141 kılo ziltemirdi baǵyndyryp, úzdik úshtiktiń qatarynan kórine almady. Alaıda ol qossaıys qorytyndysy boıynsha 258 kılo salmaqpen Azııa chempıonatynyń qola júldegeri atandy.
Bul – Arlı Chonteıdiń Azııa chempıonatyndaǵy tórtinshi júldesi. Ol byltyr Bahreınniń astanasy Manamede ótken birinshilikte – kúmis, onyń aldynda Tashkentte – altyn, al 2019 jyly Qytaıdyń Nınbo qalasyndaǵy jarysta qola júlde jeńip alǵan edi. Ońtústik Koreıadaǵy Azııa chempıonaty – kelesi jyly Parıjde ótetin Olımpııa oıyndaryna joldama beretin mańyzdy jarystardyń biri.