Prezıdent 8-9 mamyr kúnderi Reseıge jumys saparymen barady, dep habarlaıdy Egemen.kz Aqordanyń baspasóz qyzmetine silteme jasap.
Prezıdent Tver oblysyndaǵy Rjev memorıalyna baryp, 100-shi jáne 101-shi atqyshtar dıvızııalarynyń quramynda shaıqasyp, qaza tapqan qazaq jaýyngerleriniń rýhyna taǵzym etedi. Rjev shaıqasy Uly Otan soǵysy kezindegi eń iri urystardyń biri sanalady.
Sonymen qatar Memleket basshysy Trýbıno derevnıasyndaǵy baýyrlastar zıratyna barady. Onda Prezıdenttiń ákesiniń aǵasy Qasym Boltaev ta jerlengen. Rjev túbindegi shaıqasqa Qazaqstannan 22 myńǵa jýyq sarbaz ben ofıser qatysty.
Qasym-Jomart Toqaev 9 mamyr kúni Reseı Prezıdenti Vladımır Pýtınniń shaqyrýymen Uly Otan soǵysyndaǵy Jeńistiń 78 jyldyǵyna arnalǵan paradqa qatysady. Saltanatty sharaǵa Reseı tarapy TMD-ǵa múshe elderdiń basshylaryn shaqyrǵan.