Bıyl Atyraý oblysyndaǵy 12 mádenıet nysanyna jóndeý jumystary júrgiziledi. Jańadan 2 nysan salý josparlanyp otyr. Bul týraly Mádenıet jáne sport mınıstri Ashat Oralov munaıly óńir jurtshylyǵymen kezdesýinde málim etti. Ol Mahambet, Inder aýdandaryndaǵy áleýmettik nysandar jumysymen tanysty.
Mınıstrdiń aıtýynsha, elimizdegi mádenıet, sport, týrızm jáne kıno salasynda ósý úrdisi baıqalady. Jaqynda mádenıet salasyndaǵy saıasatty iske asyrýdyń 2023-2029 jyldarǵa arnalǵan tujyrymdamasy bekitilgen. Onda iske asyrylatyn negizgi maqsattar aıqyndalyp otyr.
– Elimizde birneshe tuǵyrly tulǵanyń mereıtoıyn keńinen atap ótý jospary bar. Naqtylaı aıtqanda, dańqty qolbasshy Sultan Beıbarystyń 800 jyldyǵy, kórnekti memleket qaıratkeri, ǵalym Temirbek Júrgenovtiń 125 jyldyǵyn halyqaralyq deńgeıde atap ótedi. Deshti Qypshaq dalasynan shyqqan dańqty tulǵanyń mereıtoıyna arnalǵan halyqaralyq ǵylymı-praktıkalyq konferensııalar, dóńgelek ústelder, shyǵarmashylyq keshter, kórmeler uıymdastyrý qolǵa alyndy. Jyl bastalǵan sátte Sultan Beıbarystyń esimi elordanyń bir kóshesine berildi. Sonymen qatar kúzde Qazaqstannyń Mysyrdaǵy mádenıet kúnderin ótkizý josparda tur. Oǵan Atyraý oblysynyń delegasııasy barady. XXX Kaır halyqaralyq qazirgi zamanǵy eksperımentaldy teatr festıvalinde Atyraý óneriniń qarashańyraǵy – Mahambet atyndaǵy akademııalyq qazaq drama teatry kórnekti jazýshy, dramatýrg Rahymjan Otarbaevtyń «Sultan Beıbarys» spektaklin sahnaǵa shyǵarady. Respýblıkalyq aıtys, sýretshilerdiń sımpozıýmy sekildi mádenı is-sharalar ótedi. Buǵan oblystyń mádenıet mekemeleri daıyndyǵyn belsendi júrgizip jatyr, dedi mınıstr.
Ashat Oralovtyń aıtýyna qaraǵanda, Atyraý oblysynda 2025 jylǵa deıin 20 sport jáne deneshynyqtyrý-saýyqtyrý keshenderiniń qurylysyn salý josparlanypty. Kezdesýde óńir turǵyndary birneshe máselege baılanysty jobalar usyndy. Ásirese týrızm salasyn damytý, múgedektigi bar sportshylarǵa kóńil bólý, arnaıy jattyǵý ornyn salýǵa jer telimin berý, jeke sport mektepterinde jattyǵatyn balalardy jarystarǵa jiberýge qarjy qarastyrý, fýtzalǵa arnalǵan manej salý sekildi jobalar bar.
Mınıstr Mahambet aýdanyndaǵy «О́nerpaz» aýdandyq mádenıet úıiniń jumysymen tanysty. Munda Batys Qazaqstan oblystyq Qadir Myrza Áli atyndaǵy mádenıet jáne óner ortalyǵynyń uıymdastyrýymen ótip jatqan «Dala dıdary» kóshpeli konsertine qatysty.
– Qazaqtyń Qadiriniń murasyn óshirmeı, kóshpeli konsert uıymdastyryp júrgen ortalyqtyń jumysy kópke úlgi bolarlyqtaı. Biz mundaı nysandardy oblys ortalyǵyna ǵana emes, aýyldyq jerlerde de kóptep salýymyz kerek. Aýdanda turǵyndar sanynyń ósýine baılanysty mádenıet úıin keńeıtý qajettigine kóz jetkizdim. Sol sebepten, bul mekemege jańadan tehnıkalyq jabdyqtar satyp alyp berýge jáne 400 oryndyq mádenıet úıin salýǵa sheshim qabyldadym, dedi Ashat Oralov.
Bul aýdanda 1 myń oryndyq balalar-jasóspirimder sport mektebi bar. Nysan 2003 jyly salynyp, 2017-2018 jyldary kúrdeli jóndeýden ótken. Qazir mundaǵy boks, voleıbol, fýtbol, basketbol, jeńil atletıka, qazaq kúresi, toǵyzqumalaq, dzıýdo úıirmelerine 720 oqýshy qatysady. Sport mektebinde 23 qyzmetker jumys isteıdi, onyń 9-y – jattyqtyrýshy.
Al Inder aýdanyndaǵy «Inder-Mádenıet» mádenıet úıiniń ǵımaraty 2016 jyly salynǵan. Syıymdylyǵy – 400 oryn. Munda 86 adam jumys isteıdi, onyń 55-i – mádenıet qyzmetkeri, 29-y – orkestr mamany, 31-i – tehnıkalyq qyzmetker. Mádenıet úıinde dombyra jáne bı úıirmesi bar. Buǵan qosa R.Ǵabdıev atyndaǵy halyqtyq ult aspaptar orkestri, «Arý-Ana» halyqtyq ájeler ansambli, «Aqjaıyq» halyq teatry, «Aqjaıyq» halyqtyq vokaldy aspaptar ansambli, «Ásem-aı» úlgili bı ansambli, «Boıtumar», «Bekzat» bı ansamblderi, «Atamura» aǵalar ansambli jáne «Qarlyǵash» úlgili balalar hory qurylǵan.
Inder aýdandyq jastar resýrstyq ortalyǵy ǵımaraty 1969 jyly paıdalanýǵa berilgenimen, 2019 jyly ǵana kúrdeli jóndeýden ótken. Ortalyqta 5 maman jumys isteıdi. Jastardyń bos ýaqytyn tıimdi paıdalanýdy uıymdastyrý maqsatynda ústel tennısi, bılıard taqtasy qoıylǵan. Munda «Inderbor Cinema» kınoteatry 3 seanspen kórermender qabyldaıdy. Bıletterdi «Tiketon.kz» saıtynan onlaın satyp alýǵa múmkindikter qarastyrylǵan. Bılet quny balalarǵa – 500, stýdentterge – 600-800, eresekterge – 1 200-1 800 teńge. Kınoteatr 130 kórermenge arnalǵan.
Atyraý oblysy