Qyzylordada «Eýrazııalyq yqpaldastyq: bolashaqqa betalys» taqyrybynda Qazaqstan-Reseı-Belarýs sarapshylyq forýmy ótti. «Kelesi jyldyń 1 qańtarynan jumysyn bastaıtyn ekonomıkalyq odaq HHI ǵasyrda júzege asqan alǵashqy aýqymdy bastama. Qazaqstan táýelsizdigin jarııalaǵan 20 jyl ishindegi jetistikterin saralap kórsek, biz ashyq saıasat arqasynda joǵary nátıjelerge qol jetkizdik», dedi forýmnyń betashar sózinde Qyrymbek Kósherbaev.
Eýrazııalyq ekonomıkalyq odaq qurylýyna baılanysty ár memleket jáne onyń jeke aımaqtary básekege qabiletti bolýy úshin ónerkásip pen saýdasyn damytýy tıis. «Oblys ónerkásibiniń 93,4 paıyzy munaı-gaz jáne ýran óndirýge tıesili. Bizdi mundaı ekonomıkalyq qurylym múldem qanaǵattandyrmaıdy. О́ńir ekonomıkasy belsendi ártaraptandyrýdy qajet etedi. Sondyqtan aımaqta munaı óndirýmen qatar, metallýrgııalyq klasterdi qalyptastyramyz. Úkimet metallýrgııalyq klasterdi aımaǵymyzdyń polımetall rýdalarynyń baı qorlary negizinde damytý boıynsha «Jol kartasyn» maquldady. 2010 jyly paıdalanylýǵa berilgen iri kúkirt qyshqyly zaýytynyń qýattylyǵyn eki ese ulǵaıtý jáne onyń negizinde basqa da hımııalyq óndiristerdi ashý máselesi qaralýda», dep atap ótti aımaq basshysy.
Aımaqta jaqyn arada shyny zaýyty, qubyrlar jáne sement shyǵarý óndiristerin ashý júzege asyrylady. Keleshekte kólik qurylysy zaýyty da salynady. Sondaı-aq, metallýrgııa salasyn damytý baǵytynda aýqymdy jobalar júzege asady. Iаǵnı Qyzylorda bolashaqta óndiristik aımaqqa aınalmaq. Al bilikti mamandardy daıyndaý jumysy da umyt qalǵan joq. Eýrazııalyq ekonomıkalyq odaq qurý jónindegi qujatqa qol qoıý arqasynda jastardyń akademııalyq jumylǵyshtyǵy shynaıy múmkindikke aınalady. Endi jastar odaq músheleriniń joǵary oqý oryndarynda kedergisiz oqı alady. EAEO sapaly bilim jáne kásibı daǵdylarǵa qol jetkizý jáne jumysqa ornalasý sııaqty artyqshylyq beredi. Onyń aıqyn dálelin mynadan kóre alamyz. Oblys ákimi bastamasymen 150-den astam qyzylordalyq túlek jetekshi reseılik joǵary oqý oryndarynda bilim alady. Atap aıtqanda, Máskeý bolat jáne qorytpa ınstıtýty men Sankt-Peterbýrg memlekettik tehnologııalyq ósimdik polımerleri ýnıversıtetinde oqıdy.
– Eń bastysy, keıbireýler aıtyp júrgendeı, Eýrazııalyq ekonomıkalyq odaq «jańa KSRO» emes. Bizdiń ortaq maqsatymyz – bir-birimiz úshin naryqtarymyzdy ashyp, bıznesmenderimizge birlese jumys jasaýǵa múmkindik berý, al azamattarymyzǵa eń jaqsy taýardy tańdaý úshin jaǵdaı jasaý. Ashyqtyq saıasat zamanymyzdyń jahandyq trendi bolyp tabylady. Sondyqtan óz keleshegin Qazaqstan jahandyq ekonomıka jáne dúnıejúzilik qaýipsiz júıesine ıntegrasııalaýmen baılanystyrady, – dedi ol.
Budan bólek, forýmda «Eýrazııalyq odaqtyń tarıhı mańyzy men perspektıvalary» taqyrybynda EAEO ınstıtýtynyń dırektory V.Lepehın baıandama jasady. Ekonomıkalyq odaqtyń bolashaǵyn jan-jaqty saraptap, paıdaly tustaryn basa kórsetti. Al mundaı saıası sheshimniń qabyldanýynda Elbasy Nursultan Nazarbaevtyń róli erekshe ekenin atap ótti.
Al «Alternatıva» ózekti zertteýler ortalyǵynyń dırektory A.Chebotarev óziniń «Eýrazııalyq ıntegrasııa: jańa deńgeıge shyǵý nemese shıyrshyq boıynsha qozǵalys» taqyrybyndaǵy baıandamasynda EAEO damýynyń áleýetti joldaryn jáne odaq músheleriniń syrtqy ekonomıkalyq baılanystaryn bekitý tásilderin qarastyrdy.
Belarýs strategııalyq jáne syrtqy saıası zertteýler ortalyǵynyń dırektory A.Sıvıskıı EAEO damý máseleleri men keleshegin saralady. Onyń pikirinshe, Qazaqstan, Reseı jáne Belarýs óz múddelerin birlese qorǵap, álemdik naryqqa shyǵýy kerek.
Jalpy, forým barysynda úsh eldiń ekonomıst-sarapshylary odaqtyń ózekti máselelerin talqylady.
Erjan BAITILES,
«Egemen Qazaqstan».
QYZYLORDA.