Qazaqta «Aýylyna qarap azamatyn tany» degen bar, azamattar týǵan úıin qamdaǵandaı aýylynyń kem-ketigin túgendep, turmysyn bazarly etýge jumystansa, shalǵaı aýyldan da bereke tarqamaıdy. Osyndaı ónegeli is jýyrda Mańǵystaýdaǵy Tushyqudyq aýylynda júzege asty.
Tushyqudyq – aýyzbirshilikke uıyǵan, qazynaly qarty, jalyndy jasy bar, ózderi qalyptastyrǵan jaqsy iske jurt bolyp jumyla ketýdi sabaqtasqan saltqa aınaldyrǵan aýyl. «Qaıda barasyń?» degenge, «yntymaqqa baramyn» dep jaýap bergen baqyttyń jaýaby men tańdaýy ras-aq, yntymaǵy jarasqan aýyldyń yrysy tarqamaǵan, aýyl topyraǵynan el júgin arqalaǵan «sen tur, men ataıyn» atan jilik azamattar túledi.
Alysta turyp, irgeli jumystyń tizginin ustaǵan nemese kásibiniń tasyn órge domalatqan Tushyqudyq túlekteri týǵan aýylyna qaıyrylyp, bar-joǵyn túgendeýge muryndyq boldy. Olar aýyldan sport keshenin salýdy qolǵa alǵan bolatyn, aǵalardyń jaqsy bastamasyn ilip áketken aýyl jigitteri – 1965-1996 jyl aralyǵynda týǵandar bilek pen tilek qosyp, árqaısysy óz shama-sharqynsha qurylǵan «Tushyqudyq» qoryna qarjy saldy. Budan aýyl turǵyndary da tys qalmaı, múmkindiginshe qarjylaı úlesterin qosqan. Sondaı-aq, «Mańǵystaýmunaıgaz» AQ jáne «Qarajanbasmunaıgaz» AQ kásiporyndary da qarjylaı demeýshilik jasaǵan.
Nátıjesinde mektep aýlasynan óz aldyna bólek ǵımarat bolyp eńseli sport kesheni boı kóterdi. Bos ýaqytyn mańyzdy uıymdastyryp, salamatty ómir saltyn ustanamyn degen kez kelgen aýyl turǵynyna esigi ashyq sportzalda voleıbol, basketbol, fýtbol oınaýlaryna tolyq múmkindik bar.
– Boks, qazaqsha kúres túrlerinen jattyqtyratyn arnaıy mamandy kelisip, aýylǵa aparýǵa jumystanýdamyz. Bizdiń bala kezimizde aýylda mundaı sport zaldary tek arman bolatyn, ol aýyldardaǵy qazirgi balalardyń da armany ekenin bilemiz. Sondyqtan, aýyldastarymyzǵa kómek bolsyn dedik. Sportzalda jattyǵý tegin, deıdi aýyl perzenti, qurylys jumystaryn júrgizgen, ári osy iske túlek-demeýshi retinde qomaqty qarjy salǵan «Alıans LTD» JShS dırektory Asqar Kerelbaev.
Sport kesheniniń «Angar» bóligi 30H18=540 sharshy metr. Jańa ǵımaratta sport bapkerleri otyratyn, úıirmege qatysýshy sportshylar kıinip-sheshinetin, jýynatyn oryndary bar. Keshenniń syrtqy aýlasyn abattandyrýǵa jáne bolashaqta jazǵy sport alańyn salýǵa 2500 sharshy metr jer bólingen, keshen laıyqty jumys jasaýy úshin jergilikti mektep balansyna berildi. Aýyl azamattarynyń óz kúshterimen salynǵan keshenniń ashylýy erekshe atalyp ótti. Izgi iske uıytqy bolǵan azamattarǵa jergilikti ákimdik pen «Nur Otan» partııasy atynan alǵys aıtylyp, qurmet kórsetildi.
– Partııanyń oblystyq fılıaly «Bizdiń aýyl» jobasy aıasynda aýyldan shyqqan kásipkerlerdiń, mektep túlekteriniń, qarapaıym turǵyndardyń týǵan aýylyn gúldendirý jolyndaǵy bastamalaryna árdaıym qoldaý bildirip keledi. Joba aıasynda Tushyqudyq túlekteriniń týǵan aýylynda sport keshenin salý jónindegi bastamasy qazir oblys jastarynyń qoldaýyna ıe bolyp otyr. Bul bastama basqa aýyldarda da jalǵasyn tabady dep senemiz, dedi «Nur Otan» partııasy Mańǵystaý oblystyq fılıalynyń bólim basshysy G.Nurahmethanova.
Dál osy kúni Tushyqudyqqa kórshi Shebir aýylynda da sport kesheni paıdalanýǵa berildi. Bul – «Mańǵystaýmunaıgaz» AQ-tyń aýyl turǵyndaryna tartýy bolatyn.
Gúlaıym ShYNTEMIRQYZY,
«Egemen Qazaqstan».
Mańǵystaý oblysy.