Ǵajap! Mýzeı túni. Bul merekege aǵylǵan adam kóp. Kele sala kórgenimiz uzyn-sonar kezek boldy. Mádenı ordaǵa asyqqan kórermenniń osyndaı qyzyǵýshylyǵy qýantady. Mýzeı – ótkenniń ózegi. Ol – tarıhı jadymyz ben mádenı muramyzdyń ordasy ǵana emes ulttyq rýhymyzdyń beınesi. О́tkenin bilgen eldiń erteńi de jaryq.
Búgin «eńbektegen baladan, eńkeıgen qartqa» deıin bári mýzeıde. 47 myńnan astam adam tarıhyn tanyp, rýhanı kúsh alýǵa asyqqan. Kelýshilerdiń arasynda mýzeı tabaldyryǵyn alǵash attaǵandar da bar. «Mýzeı túni» sharasy ótetinin bilip arnaıy kelgen. Bundaǵy qundy jádigerlerdi, tarıhı muralar men óner týyndylaryn tamashalap erekshe áserlengennen keıin aldaǵy ýaqytta taǵy kelýge nıetti ekenin aıtyp jatyr. Eń úlken jetistik osy. Bul sharanyń maqsaty da kópshilikti tarıhı-mádenı jadymyzben jaqyndastyrý.
«Mýzeı túni» aksııasy barysynda merekege oraı konserttik baǵdarlama uıymdastyryldy.
Mýzeıde ulttyq aspaptyń úni jańǵyryp, «Qorqyt» etno-folklorlyq ansambli, Úrmeli aspaptar orkestri óner kórsetti. Sondaı-aq Mádenıet jáne sport mınıstri Ashat Oralov arnaıy quttyqtap, sóz sóıledi jáne mýzeı salasynda eleýli eńbek etken birqatar azamatqa nagrada tabystady.
«Tamyry tereń tarıhymyzdy tanytýda elimizdegi mýzeılerdiń róli óte mańyzdy. Jalpy el boıynsha 271 mýzeı bolsa, olarda 3 mıllıonǵa jýyq qundy eksponattarymyz bar. Onda kóptegen mýzeı qyzmetkeri jumys isteıdi. Prezıdentimiz eńbek adamdaryn aıryqsha qurmettýimiz kerek ekenin aıtyp, arnaıy tapsyrma bergen bolatyn. Sondyqtan mýzeı qyzmetkerlerin búgingi merekemen quttyqtaımyn. Sharaǵa ájelerimiz, atalarymyz, qaryndastarymyz, baýyrlarymyz kelip jatyr. Urpaqtar sabaqtastyǵyn saqtaı otyra uly qazaq dalasynyń mádenıetin damytýda eńbek eteıik, qurmetti áriptester», dedi mınıstr Ashat Oralov.
Sondaı-aq mádenıet jáne sport mınıstri aldaǵy ýaqytta «Mýzeı túni aksııasy úlken qalalarda ǵana emes, búkil el aýmaǵyn qamtýy kerek dep aıtty.
«Biz osydan bir aı buryn paleontalogııa zalyn ashtyq. Qolónershilerdi qoldaý maqsatynda qolónershiler ortalyǵy ashylǵan bolatyn. Atqarylyp jatqan ister kóp. Búgin kelýshiler sany 10 myńǵa deıin jetedi dep otyrmyz. Bir qýantarlyǵy otbasymen kelgender óte kóp eken. Mádenıetimizdi taný maqsatynda osy sharanyń belsendi qatysýshylary bolyp otyr. Tarıhymyzdy pash etý, jas býynǵa túsinikti tilmen jetkizý úshin bul sharanyń jalǵasy mindetti túrde bolady. Endi elorda tórinde ǵana emes, Qazaqstannyń barlyq aımaǵynda ótkizilse nur ústine nur bolar edi degen oıdamyn», dedi mınıstr.
Shara aıaqtalǵansha kezek kóbeımese, azaıǵan joq. Sózdiń basynda tańdanysymyzdy jasyrmaǵanymyz da sol. Rasynda, el úshin tarıhyn biletin, mádenıetin túsinetin tulǵalar qajet. Ol úshin mýzeıdiń atqarar eńbegi men alatyn orny erekshe!