Balalardy urýǵa zańmen tyıym salynýy múmkin. Mundaı usynysty BUU Qazaqstandaǵy balalar qorynyń ókili Artýr Van Dızen aıtty, dep habarlaıdy Egemen.kz.
«Dene jaraqatyn salýǵa zańmen tyıym salý – óte mańyzdy. Búginde 65 memlekette bul zań kúshine endi. Taǵy 27 el bul zańǵa qosylýdy josparlap otyr. Onyń arasynda Qazaqstannyń kórshileri de bar. Sondyqtan otbasynda da, otbasynan tys jerde de dene jaraqatyna tyıym salý mańyzdy bolyp otyr. Biz balalarǵa zorlyq-zombylyq jasalýyna, olardy uryp-soǵýǵa jol bermeýimiz kerek. Bul – qoǵam aldyndaǵy mindetimiz», dedi Artýr Van Dızen.
Al polıseıler «balalardy túngi ýaqytta kóshege jalǵyz jibermeý kerek» dep otyr. Tártip saqshylarynyń dereginshe, Qazaqstanda jyl saıyn kóshede beımezgil júrgen 100 myńnan astam jetkinshek polısııa bólimshesine jetkiziledi. Al osy jyldyń basynan beri úılerinen tys jerde júrgen 22 myńnan astam kámeletke tolmaǵan bala ustalypty.
«Zańnamada túngi ýaqytta oıyn-saýyq oryndarynda kámeletke tolmaǵandy kirgizýge múmkindik beretin kásipkerlerge qatysty jaýapkershilik qarastyrylǵan. Bıyl osyndaı 680 kásipker jaýapqa tartyldy. Biz mundaı adamdardy Ishki ister organdarynyń esebine qoıamyz, olarmen profılaktıkalyq jumys júrgizemiz», dedi QR IIM Ákimshilik polısııa komıteti tóraǵasynyń orynbasary Renat Zulhaıyrov.