Elordada Qazaqstannyń Eńbek Eri, kúresten KSRO-nyń eńbek sińirgen sport sheberi, Qazaqstannyń eńbek sińirgen jattyqtyrýshysy, Máskeý Olımpıadasynyń chempıony Jaqsylyq Úshkempirovti eske túsirýge arnalǵan respýblıkalyq ashyq týrnır aıaqtaldy. Atalǵan jarysta elimizdiń barlyq aımaǵynan kelgen balýandardan bólek, Qyrǵyz Respýblıkasy, О́zbekstan, Tájikstan, Ázerbaıjan jáne Izraıldiń 20 jasqa deıingi eń úzdik 164 balýany bozkilemniń shańyn qaqty.
Jaqsylyq Úshkempirovtiń esimi búginde tek kúres salasynyń jankúıerlerine ǵana emes, búkil álemge belgili desek artyq aıtqandyq bolmas. 69 jyl ǵumyr keshken abzal azamat tek Jambyl óńirinde ǵana emes, Qazaqstanda osy kúres túriniń órkendeýine ólsheýsiz úles qosty.
Bozbala shaǵynda qazaqsha kúrestiń qyr-syryna qanyqqan Jaqsylyq Úshkempirovtiń keıinnen ózin dúnıe júzine tanytqan kúreske kezdeısoq kelgenin jankúıerler jaqsy biledi. Semeıdegi joǵary oqý orynynda oqyp júrgende bolashaq Olımpıada chempıony shańǵy tebýden synaq tapsyrý kerek bolǵan. Alaıda shańǵy teýip kórmegen Jaqsylyq úshin bul synaq qıynǵa soqty. Sodan dene shynyqtyrý pániniń muǵalimi oǵan jeńildik jasap, «Eger ózge stýdentti beldesýde jeńetin bolsań, synyq qaǵazyńa qol qoıyp beremin», deıdi. Aýyldyń shańynda aýnap ósken, mektep kezinde qazaqsha kúrespen aınalysqan Jaqsylyq Úshkempirov qarsylasyn buıym qurly kórmeı, «á» degennen alyp jyǵady. Osydan keıin Jaqsylyqtyń kúrestegi juldyzdy sáti jana bastady. 1971 jyly erkin kúresten Qazaqstan chempıony atansa, 1972 jyly grek-rım kúresinen KSRO birinshiliginde besinshi orynǵa ıe boldy. Araǵa bir jyl salyp chempıonatynyń qola júldesine qol jetkizip, KSRO quramasynyń qataryna qabyldandy. Ári qaraıǵy dańqty otandasymyzdyń jetistikteri barshaǵa belgili.
Bıyl qatarynan úshinshi jyl uıymdastyrylǵan halyqaralyq týrnırge toqtalar bolsaq, úsh kúnge jalǵasqan respýblıkalyq bilekti jas balýandar básekesinde jerlesterimizdiń arasynan Aıbek Aıtbekov (55 kg), Oljas Erǵalı (77 kg), Islam Evloev (82 kg), Nurasyl Amanaly (87 kg), Nurtas Qydyrbaev (97 kg) jáne Johar Ýzarov (130 kg) óz salmaǵynda chempıon atandy. Sonymen qatar balýandarymyz 5 kúmis, 14 qola júldeni el qorjynyna saldy. Sóıtip, jalpykomandalyq esepte Qazaqstan balýandary dara shyqty.
Ázerbaıjan quramasy sapynan Ilkın Gýrbanov (60 kg), Kanan Abdýllazade (67 kg, U-20 álem chempıony) men Rýslan Nýrýllaev (72 kg) óz salmaǵynda úzdik shyqqan soń jalpy esepte 2-orynǵa turaqtady. Úzdik úshtikti túıindegen Qyrǵyz Respýblıkasyna jalǵyz altyn medaldi Jantoro Mırzalıev (63 kg) syılady.
«Bul jarystyń biz úshin orny erekshe. Jyldan-jylǵa aýqymy keńeıip kele jatqany qýantady. Kelesi jyly budan da kóp el qatysýy úshin jyldyń basyna aýystyrý kerek bolady. Ony Halyqaralyq kúres federasııasynyń kúntizbesin eskere otyryp, bekitýimiz qajet. Mysaly, osy jarysqa О́zbekstan quramasy biraz myqty balýandaryn jibere almady. Sebebi onda qazir el chempıonaty ótip jatyr. Al Ázerbaıjan men Qyrǵyzstan quramasy negizgi qurammen keldi», dep aıtty Qazaqstan áıelder, grek-rım jáne erkin kúres federasııasynyń prezıdenti, Parlament Májilisiniń depýtaty Dáýlet Turlyhanov.
Osy týrnırden keıin Astana qalasynda Qazaqstan men Ázerbaıjan quramasy birlesken oqý jattyǵý-jıynyn ótkizip, qurlyq chempıonatyna daıyndyqqa kirisedi. Bizdiń balýandar shilde aıynyń 12-20-sy kúnderi Iordanııa astanasy – Ammanda sary qurlyq básekesinde (U-15 pen 20) baq synasa, Ázerbaıjan sportshylary Eýropa chempıonatynda júldege talasady. Osy jas sanatyndaǵy álem chempıonaty Polsha astanasy Varshavada 14-20 tamyz aralyǵynda bolady.