20 mamyr kúni Premer-mınıstr Álıhan Smaıylov Úılestirý shtabynyń otyrysyn ótkizdi, onda eldi mekenderdi sýmen qamtamasyz etý sharalary qaraldy, dep habarlaıdy Egemen.kz.
Memleket basshysynyń tapsyrmasyna sáıkes 2025 jyldyń sońyna deıin halyqty sapaly aýyz sýmen 100% qamtamasyz etý josparlanyp otyr.
Búgingi tańda aýyz sýǵa qoljetimdilik qalalarda – 98,4%-dy, aýyldarda – 94,5%-dy qurap otyr.
Eń az qamtý Abaı, Aqmola jáne Jambyl oblystarynyń qalalarynda, sondaı-aq Aqmola, Qostanaı jáne Soltústik Qazaqstan oblystarynyń aýyldarynda tirkelgen.
Bıyl sýmen jabdyqtaý, sý burý júıelerin salý jáne rekonstrýksııalaýǵa respýblıkalyq bıýdjetten 402 jobany iske asyrýǵa 280 mlrd teńge bólindi.
Jalpy, 2025 jylǵa deıin qalǵan 25 qala men 1 395 aýyldyń halqyn taza aýyz sýmen qamtamasyz etý qajet.
Premer-mınıstr mamyr aıynyń basynda Úkimet otyrysynda aýyz sý jobalary boıynsha «aıaqtalmaǵan qurylystar» týraly aıtylǵanyn eske saldy. Olardy aıaqtaımyz degenshe, qoldanystaǵy ınfraqurylymdar jaramsyz bolyp qalýda.
«Aqtóbe qalasyndaǵy Qarǵaly shaǵyn aýdanynyń turǵyndary sýyq sý men ystyq sýdyń jıi toqtap qalatynyna shaǵym aıtýda. Aqmola oblysynyń Egindikól aýdanynda ábden tozyǵy jetken Nura sý ótkizgishi jalǵyz ózi 12 aýyldy sýmen qamtamasyz etip otyr. Ondaǵy sýdyń shyǵyny 70-80%-ǵa jetedi. Bul aýyldardyń turǵyndary qubyrlardyń jıi jarylýynan aılar boıy sýsyz qalady», dedi Álıhan Smaıylov.
Bular bıyl halyqtan resmı túrde kelip túsken 9 myń shaǵymnyń birneshe mysaly ǵana.
Ol mundaı kemshilikter tek búgin aıtylǵan óńirlerge ǵana emes, kóptegen ákimdikterge tán ekenin aıtty.
«Cý máselesiniń úlken áleýmettik mańyzdylyǵyn eskere otyryp, árbir óńir, ásirese eń tómen kórsetkishteri bar oblystar jumysty jandandyrýy kerek. Indýstrııa mınıstrligi baqylaýdy barynsha kúsheıtýi tıis», dedi Á.Smaıylov.