Otandyq «Dıadıa Vanıa» dep atalatyn Telegram-kanal ózderiniń sporttyq mansabynda eń kóp tabys tapqan el tennısshileriniń tizimin jarııalady. Baı-qýattylardyń reıtınginde elimizdiń birinshi jáne álemniń tórtinshi raketkasy Elena Rybakına kósh bastap tur.
Árıne, oǵan esh tańdanýǵa bolmaıdy. Bıyldyń ózinde ǵana Elena Indıan-Ýells, Rımdegi týrnırlerde bas júldeni oljalasa, Aýstralııanyń ashyq birinshiligi men Maıamıdegi dodada fınalǵa deıin jetti. Onyń syrtynda, byltyr Ýımbldonda jeńimpaz atanyp, WTA men ITF jarystaryn qosa alǵanda toǵyz márte top jarǵany taǵy bar. Osylaısha, kelesi aıda 24 jasqa tolǵaly otyrǵan Elena Rybakına 10 155 965 AQSh dollary kóleminde syıaqy aldy.
Ekinshi orynda – Mıhaıl Kýkýshkın. 35 jastaǵy jerlesimizdiń eń jaqsy kórsetkishi – Aýstralııanyń ashyq birinshiligi (2012 jyly) men Ýımbldonnyń (2019) tórtinshi kezeńine deıin jetýi. 2010 jyly ol Reseıdiń Sankt-Peterbýrg qalasynda ótken ATR týrnırinde aldyna jan salmady. Kýkýshkınniń tabysy – 6 815 090 dollar.
Úzdik úshtikti Iаroslava Shvedova túıindep tur. 35 jastaǵy burynǵy oıynshy qazir sporttyq karerasyn aıaqtap, jattyqtyrýshylyq qyzmet atqaryp júr. Kezinde ol Rolan Garros (2010, 2012) pen Ýımbldonnyń (2016) shırek fınalynda óner kórsetti. AQSh-tyń ashyq birinshiliginiń (2016) tórtinshi aınalymyna joldama aldy. Ásirese Shvedova juptyq saıystarda ózin jaqsy qyrynan kórsete bildi. Jarystyń dál osy túrinde otandasymyz AQSh-tyń ashyq birinshiligi (2010) men Ýımbldonda (2010) qarsylas shaq keltirmedi. Rolan Garrostyń (2015) aqtyq synyna deıin alqynbaı jetti. Juptasyp oınaýda WTA týrnırlerinde 13 ret dara shyqsa, taǵy bir ret jekelegen saıysta baǵy jandy. Osy tabystarynyń arqasynda Iаroslavanyń esepshotyna 6 717 223 dollar aýdaryldy.
Sondaı-aq TOP-10-tyń qatarynda Iýlııa Pýtınseva (6 442 126 AQSh dollary), Aleksandr Býblık (4 618 096), Zarına Dıas (3 682 468), Andreı Golýbev (229 737), Galına Voskoboeva (2 525 167), Aleksandr Nedovesov (1 253 165), Anna Danılına (660 132) bar.