Qazaqstandyq qutqarýshylar Almaty taýlarynda joǵalyp ketken aýstralııalyq týrıstiń denesin tapty, dep habarlaıdy Egemen.kz.
1995 jyly týǵan Aýstralııa azamaty 21 mamyr kúni Úlken Almaty shatqalyna qaraı taýǵa shyqqan. Polısııa departamentine sol er adammen bir jataqhanada turǵan Reseı azamaty júgingen. Joǵalǵan adamdy sońǵy ret jumystaǵy áriptesi kórgen. Onyń aıtýynsha, olar 20 mamyr kúni týrıst bolyp kelgen. 22 mamyrda tańǵy saǵat 7-de týrıster qaıtyp oralýy kerek edi, alaıda dosy qala áýejaıyna jalǵyz kelgen.
Týrısti izdeýge 6 adam men 1 kınologııalyq brıgadadan turatyn Respýblıkalyq jedel-qutqarý jasaǵynyń qutqarýshylarynyń jedel toby jiberilip, saǵat 23:40-ta izdeý jumystary bastaldy. Saǵat 02:40-ta qutqarýshylar men polısııa departamentiniń qyzmetkerleri ǵarysh stansııasyna kóterilip, betkeılerdi tekserdi.
Túnde Úlken Almaty kólinde aýa raıy buzylyp, jańbyr, qar jaýyp, qatty jel soqqan. Saǵat 15:48-de Tótenshe jaǵdaılar mınıstrligine qarasty jedel-qutqarý jasaǵynyń bastyǵy Arystanbaev Baýyrjan spýtnıktik baılanys arqyly aqparat berdi, qutqarýshylar Almaty ákimdiginiń avarııalyq-qutqarý jumystary qyzmetiniń qutqarýshylarymen birlese otyryp, Aıýsaı shatqalyndaǵy alǵashqy sarqyramadan máıitti tapty.
Osy tusta Tótenshe jaǵdaılar mınıstrliginiń qutqarýshylary taýdaǵy qaýipsizdik erejelerin eske saldy.
«Taýǵa jalǵyz shyqpańyz, týystaryńyz ben dostaryńyzǵa qaıtýdyń boljaldy ýaqyty týraly aldyn ala eskertińiz. Jolǵa shyqpas buryn taýlardaǵy aýa-raıyn muqııat qarańyz. Sómkelerińizge mindetti túrde fonar, sirińke, qýattaǵysh, GPS-navıgator, qosymsha kıim, jyly shulyq alyńyz», dedi qutqarýshylar.