Senattyń Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń depýtattary memlekettik organdardyń ókilderimen kezdesip, Aqmola oblysyna sapar barysynda aıtylǵan usynystardy iske asyrý máselelerin talqylady, dep habarlaıdy Egemen.kz Senattyń baspasóz qyzmetine silteme jasap.
Komıtet tóraǵasy Álı Bektaev óz sózinde senatorlar bıyl 12 mamyrda Aqmola oblysynda kóshpeli otyrys ótkizip, óńirdegi aýyl eńbekkerlerimen kezdeskenin atap ótti. Senatorlar aýyl turǵyndary kótergen máselelerge taldaý jasap, ony salalyq memlekettik organdardyń nazaryna usyndy.
«Senat depýtattary elimizdiń barlyq óńirlerimen tyǵyz baılanys ornatyp, osy óńirlerdiń ózekti máselelerin respýblıkalyq deńgeıde kóterip keledi. О́ńirlerge saparlar men senatorlardyń jergilikti jerlerde fermerlermen kezdesýleri ózekti máselelerdi sheshýdi kózdeıdi. Búgin biz Aqmola oblysyna sapardyń keıbir qorytyndylaryn shyǵaryp, anyqtalǵan máselelerdi sheshý maqsatynda jaýapty memlekettik organdardyń josparlaryn tyńdaýǵa nıettenip otyrmyz», dedi Álı Bektaev.
Sharaǵa aýyl sharýashylyǵy mınıstriniń orynbasary, Aqmola oblysy ákimdiginiń jáne basqa da memlekettik organdardyń, aýyl sharýashylyǵy ónimderin óndirýshilerdiń ókilderi qatysty.
Kezdesý barysynda aýyl sharýashylyǵy mınıstrliginiń ókilderi senatorlarǵa aýyl sharýashylyǵy óndirýshilerin memlekettik qoldaý, jemshóp bazasymen qamtamasyz etý, arnaıy veterınarııalyq is-sharalar ótkizý jáne ishki naryqty qorǵaý jónindegi jumys josparyn ázirleýge qatysty atqarylǵan jumystar týraly aıtyp berdi.
Sharaǵa qatysýshylar jınalys qorytyndysy boıynsha aýyldyq aýmaqtardy odan ári damytýǵa baǵyttalǵan birqatar usynys ázirledi.