Memleket basshysy Qasym-Jomart Toqaev Chelıabi – Bolashaq – Iran temirjol magıstralimen júrdek júk poıyzdaryn iske qosýdy usyndy, dep habarlaıdy Egemen.kz.
Memleket basshysynyń aıtýynsha, ári qaraı ıntegrasııalyq damýdyń taǵy bir mańyzdy baǵyty – jańa halyqaralyq kólik arterııalaryn qurý josparlanýda.
«Bizdiń ekonomıkalyq odaq saıyp kelgende, Eýropa men Azııa, jahandyq ońtústik pen soltústik arasyndaǵy baılanystyrýshy býynǵa aınalaryna senimdimin. Biz Reseı Federasııasynyń QHR, Úndistan, Pákistan, Iran, Taıaý Shyǵys jáne Ońtústik-Shyǵys Azııa elderi baǵytynda dálizder qalyptastyrý nıetin quptaımyz. Transkaspıı baǵytymen ushtastyra otyryp, Soltústik – Ońtústik kólik dálizin damytý qajettigi týraly oı pisip-jetildi dep oılaımyn», dedi Memleket basshysy.
Osyǵan baılanysty Q.Toqaev Qazaqstannyń barlyq múmkindikteri men resýrstaryn jumyldyryp, EAEO-nyń senimdi logıstıkalyq haby bolatynyn jetkizdi.
«Taqyryptyq bastama retinde Chelıabi – Bolashaq – Iran temirjol magıstralimen júrdek júk poıyzdaryn iske qosýdy usynamyz. Bul úshin Chelıabınskide júk jınaqtaıtyn ortalyq ashyp, «Soltústik – Ońtústik» kólik dáliziniń qazirgi ınfraqurylymyn paıdalanýǵa bolady. Biz ózimizdiń Beıneý – Mańǵystaý temir jol jelisindegi jáne Beıneý – Shalqar avtokólik jolyndaǵy talapqa saı kelmeıtin ýchaskelerdi qaıta salýǵa ázirmiz. Tıisti júk tasymaly aǵynyn qalyptastyrý úshin kúsh jumyldyrý mańyzdy. Sol sebepti Qazaqstan muny sózsiz iske asyrady. Baqty – Aıagóz temir jol qurylysyn ózara tıimdi yntymaqtastyǵymyzdyń naqty mysaly deýge bolady. Onyń iske qosylýy Qazaqstannyń da, Reseıdiń de Qytaı baǵytyna jóneltetin júk kólemin aıtarlyqtaı arttyrýǵa múmkindik beredi», dedi Prezıdent.
Sonymen qatar Qasym-Jomart Toqaev Iran men Túrikmenstannyń teńiz jáne qurǵaq porttarynda ınfraqurylym salýǵa birlesken ınvestısııalar qarastyrýǵa bolatynyn aıtty. Bul múshe memleketterdiń eksport geografııasyn edáýir keńeıtedi jáne logıstıkalyq múmkindikterin ulǵaıtady.
«Fızıkalyq ınfraqurylymdy damytýmen qatar taýarlar tranzıtiniń jalpy sıfrlyq júıesin qurý sheshimderin ázirleý óte mańyzdy. Ol senimdi, biraq qoldanýǵa ońaı jáne ozyq sıfrlyq tehnologııalarǵa negizdelýi kerek. Elektrondy plombalardy, jedel aqparat almasýdyń kepildik júıesin paıdalaný, «E-tereze» júıesin damytý máselelerin sheshý qajet. Bul sharalar taýar aǵynyn jyldamdatatyn jáne jetkizý tizbegin ońtaılandyratyn ortaq sıfrlyq mýltımodaldy dáliz qurýǵa múmkindik beredi», dedi Qasym-Jomart Toqaev.