«Jolaýshylar tasymaly» AQ balalar úshin poıyzǵa bılet alý tártibin túsindirdi, dep habarlaıdy Egemen.kz.
«7 jasqa deıingi balalar úshin poıyzǵa miný aqysy tegin. Alaıda olarǵa bólek oryn qarastyrylmaıdy. О́zine bólek oryn berý úshin balalar bıletin alý qajet. Eger 7 jasqa deıingi balalar sany eki nemese odan kóp bolsa balalarǵa arnalǵan bılet alý qajet bolady. 7-15 jas aralyǵyndaǵy balalar bıletine eresekter bıleti qunynyń 50 paıyzy kóleminde jeńildikter bar. 15 jastan joǵary balalarǵa eresek adamdarmen birdeı baǵada bılet alynady», dep habarlady «Qazaqstan temir joly» UK» AQ baspasóz qyzmeti.
Balalar bıletin alý úshin qandaı qujattar qajet?
Balaǵa bılet alý úshin jeke basyn kýálandyratyn qujat – balanyń týý týraly kýáligi nemese pasporty kerek bolady.
Balanyń týý týraly kýáligi nemese onyń notarıaldy kýálandyrylǵan kóshirmesi bıletpen birge jolserikke poıyzǵa miner aldynda beriledi.
Balanyń jalǵyz ózin poıyzben qalaı jiberýge bolady?
15 jasqa deıingi balalar tek eresektermen birge ǵana poıyzǵa otyra alady. Eger bala poıyzda onyń zańdy ókili bolyp tabylmaıtyn adammen birge baratyn bolsa, onda sol adamnyń balany ertip júrýine ruqsat etilgen notarıaldy kýálandyrylǵan senimhat kerek bolady.
15 jastan asqan balalar notarıaldy kýálandyrylǵan senimhatpen ózi saıahatqa shyǵa alady.
Al jolaýshylar poıyzyna otyrǵyzǵanda nemese jolda balanyń qasynda zańdy ókili birge bolǵan jaǵdaıda senimhat kórsetý talap etilmeıdi.