Áńgimelesý barysynda Qasym-Jomart Toqaev pen Pak Chjın ekijaqty strategııalyq seriktestiktiń qazirgi jaı-kúıi men damý perspektıvalary jóninde pikir almasty, dep jazady Egemen.kz Aqordanyń baspasóz qyzmetine silteme jasap.
Memleket basshysy Qazaqstan men Koreıa arasyndaǵy saýda, ınvestısııa jáne tehnologııa salalaryndaǵy ózara qarym-qatynastardyń, sondaı-aq mádenı-gýmanıtarlyq baılanystardyń qarqyndy damyp kele jatqanyn atap ótti.
«О́zderińizge málim, Koreıa biz úshin Azııadaǵy negizgi seriktesterdiń biri retinde óte mańyzdy. Ekijaqty yntymaqtastyq baǵytyndaǵy barlyq jetistikti joǵary baǵalaımyz. Sonymen qatar ekijaqty saýda kólemi 6 mıllıard dollardan asqanyna óte qýanyshtymyn. Degenmen bizde mol múmkindik bar. Ony bolashaqta paıdalaný qajet. Sondyqtan sizdiń bul saparyńyz – ózekti halyqaralyq máseleler jóninde ózara pikir almasý úshin jaqsy múmkindik. Qazaqstan men Koreıanyń negizgi halyqaralyq máseleler boıynsha ustanymdary ortaq. Halyqaralyq arenada da, ekijaqty formatta da bizdi jaqyndata túsetin kóptegen ortaq isterimiz bar dep senemin», dedi Memleket basshysy.
Memleket basshysy KIA avtomobıl óndirisin, Hyundai zaýytynyń jumysyn, ferroqorytpa jáne bolat óndirisin, «Aqyldy ferma» jobasyn jáne basqa da bastamalardy mysalǵa keltirdi.
Kezdesý barysynda Qasym-Jomart Toqaev eki el arasynda ekijaqty qarym-qatynastyń berik ınstıtýttyq jelisi qalyptasqanyna nazar aýdardy. Saýda-ekonomıkalyq, ǵylymı-tehnıkalyq yntymaqtastyq jónindegi qazaq-koreı úkimetaralyq komıssııasy men Iskerlik keńes osy baılanystarǵa dáneker bolyp otyr. Bul rette Prezıdent atalǵan qurylymdardyń áleýetin tolyq paıdalanýǵa shaqyrdy.