Astanada Áskerı ǵylym akademııasynyń qurylǵanyna 10 jyl tolýyna oraı «Qazaqstan Respýblıkasynyń Áskerı ǵylymyn damytý: problemalary men perspektıvalary» atty ǵylymı-praktıkalyq konferensııa ótti.
Forýmǵa Qarýly Kúshterdiń, áskerı quralymdardyń, Prezıdent janyndaǵy Ulttyq ǵylym akademııasynyń, Indýstrııa jáne ınfraqurylymdyq damý mınıstrliginiń ókilderi, Eýrazııa ulttyq ýnıversıtetiniń oqytýshylary jáne Qarýly Kúshterdiń ardagerleri qatysty.
Konferensııany Áskerı ǵylym akademııasynyń prezıdenti, zapastaǵy polkovnık Muhtar Serikpaev ashyp, áskerı oqý oryndarynda jasyna qaraı magıstratýra men doktorantýrada oqytý máselelerin kóterdi. Onyń pikirinshe, áskerı ǵylymdy damytý jáne memlekettiń ulttyq qaýipsizdigin nyǵaıtý maqsatynda quzyretti ortalyq qurý qajet.
Odan bólek, Prezıdent janyndaǵy Ulttyq ǵylym akademııasynyń vıse-prezıdenti Lázzat Eralıeva, Áskerı ǵylym akademııasynyń birinshi vıse-prezıdenti, otstavkadaǵy general-leıtenant Bolat Janasaev, Qorǵanys mınıstrligi Áskerı bilim jáne ǵylym departamentiniń bastyǵy, general-maıor Jumabek Ahmetov, UQK Shekara qyzmetiniń Jaýyngerlik kezekshilik jáne sıtýasııalyq aqparattandyrý departamentiniń bastyǵy, polkovnık Naǵmet Sadyqov, Málik Ǵabdýllın atyndaǵy Azamattyq qorǵanys akademııasy bastyǵynyń oqý jumysy jónindegi orynbasary, polkovnık Qýanyshbek Kármenov, t.b. sala mamandary baıandama jasady.
Aıta keteıik, «QR Áskerı ǵylym akademııasy» RQB 2013 jyly áskerı ǵylym men ǵylymı mektepterdiń sabaqtastyǵyn damytý maqsatynda qurylǵan bolatyn. Akademııa ǵalymdary Ǵylym jáne joǵary bilim mınıstrliginiń, Qorǵanys mınıstrliginiń, Indýstrııa jáne ınfraqurylymdyq damý mınıstrliginiń, sondaı-aq kúshtik qurylymdardyń múddesi úshin granttyq jáne baǵdarlamalyq-maqsatty qarjylandyrý jobalaryn oryndaıdy.
Oqý ornynyń «ÁǴA-habarshysy» degen atpen ǵylymı jýrnaly shyǵady. Onyń betterinde Ulttyq qorǵanys ýnıversıtetiniń magıstranttary men doktoranttary, Qazaqstan men taıaý shetelderdiń belgili ǵalymdary maqalalar jarııalap turady. 2020 jyly akademııa quramynda Qaýipsizdik jáne arnaıy bilim berý baǵdarlamalary ınstıtýty quryldy. Onyń negizinde aýmaqtyq qorǵanys, jumyldyrý daıyndyǵy, kadrlyq jumysty uıymdastyrý jáne ákimdikterdiń, memlekettik organdardyń jáne basqa da uıymdardyń mamandaryn áskerı esepke alý kýrstary ótedi.
Ataýly kúnge oraı konferensııaǵa qatysýshylar «Áskerı ǵylymdar akademııasyna 10 jyl» tósbelgisimen marapattaldy.