Bala erkin tárbıelegen abzal, biraq «tym erkeletpeý qajet» deıtinder de bar. Bala tártipke baǵynýy kerek, biraq qur buıyra berýge de bolmaıdy. Dese de, bala tárbıesinde balans saqtaý qajet ekenin esten shyǵarmaǵan jón.
Maǵjan Jumabaev minezdi tárbıeleýde eki jaqty teń ustaýdy bylaı túsindiredi:
Balada berik hám durys minez paıda bolý úshin tárbıeshi myna negizgi eki shartty oryndaý kerek:
1) Balanyń shamasy jetetin kez-kelgen iste tolyq erkindik berý. Basqanyń kúshine, kómegine senip ketpeı, óz qolynan kelmeıtin sharýada ǵana tárbıeshi kómek kórsetip jiberýge mindetti.
2) Balany qubylmaıtyn, usaqtyqpen qajytpaıtyn temir tártipke (dıssıplına) baǵyndyrý kerek. Balany erkine jiberý ony erlikke, batyrlyqqa úıretse, temir tártipke baǵyndyrý ony shydamdylyqqa, tabandylyqqa úıretedi. Osy eki jaǵy teń adamnyń minezi kúshti bolmaq. Balany tipti erkine jibermeý ony jasqanshaq, jasyq, qorqaq qylady. Al tizginsiz qoıa berý, lám-mım demeı bar erkeligin oryndaı berý balany beıbastaq, essiz tentek qylyp shyǵarady.
Osy eki jaqtyń bireýine aýdaryp jibermeı, balany ortada ustaı bilý úshin tárbıeshi mynany isteý kerek:
1) Balaǵa bir nárseni iste degende aqyrmaı-baqyrmaı, salmaqpen hám bylaı da jaraıdy degen syqyldy tabansyzdyq kórsetpeý kerek. Tárbıeshiniń tabansyzdyǵyn sezse, bala ony syılaýdan, tilin alýdan qalady. Tárbıeshi óz isinde tııanaqty, tabandy bolý kerek. Bala adam aıtar emes, eliktempaz bolady. Tárbıeshi tııanaqty bolsa, bala onyń tııanaqtylyǵyna elikteıdi. Tárbıeshi tııanaqsyz bolsa, bala onyń tııanaqsyzdyǵyna elikteıdi.
2) Balaǵa bir nárseni iste degeńde de, isteme degende de sol buıryqtyń sebebin uqqandaı qylyp balaǵa uqtyryp otyrý kerek. Sebebin uqsa birazdan soń bala óz betimen-aq durys iske umtylyp, teris isten tyıylatyn bolady. Erinbeı, jalyqpaı balaǵa árbir istiń sebebin uqtyra berý kerek. Máni-jaıyn uqtyrmaı, qur buıryq berýshi adam – tárbıeshi emes. Danyshpan Abaı: «ustazdyq qylǵan jalyqpas úıretýden balaǵa. Tárbıeshi balanyń qaharly qojasy bolmasyn, jumsaq joldasy bolsyn» degen eken.