Elordalyq Kólik jáne jol-kólik ınfraqurylymyn damytý basqarmasy Astana-Qaraǵandy tas joly men Qobda tuıyq kóshesiniń qıylysynda, Aıtmatov kóshesi men Qorǵaljyn tas jolynyń qıylysynda jóndeý júrgizilip jatqanyn habarlady, dep jazady Egemen.kz qala ákimdiginiń baspasóz qyzmetine silteme jasap.
Jóndeý jumystary jol qozǵalysy qaýipsizdigin qamtamasyz etý maqsatynda qalanyń PD ákimshilik polısııa basqarmasynyń kelisimi boıynsha júrgizilip jatyr.
«Aıtmatov kóshesi men Qorǵaljyn tas jolynyń qıylysynda oń jaq sezdiń jol tósemine ortasha jóndeý júrgizilýde. Osyǵan baılanysty 7 maýsymda Aıtmatov kóshesinen Ilınka eldi mekeni baǵytyndaǵy oń jaq sezi tolyǵymen jabyldy», delingen habarlamada.
Aıta ketsek, Astana-Qaraǵandy tas joly men Qobda tuıyq kóshesiniń qıylysynda da jol tósemin jóndeý jumystary bastalyp ketken. Bul oryndaǵy qozǵalys 7-9 maýsym aralyǵynda ishinara jabyq bolady.
«Elorda turǵyndary men qonaqtary qala joldarynda keptelis jaǵdaılaryn boldyrmas úshin qozǵalys baǵytyn aldyn ala josparlaýy qajet», dep qosty ákimdik ókilderi.