Elimizde jalǵan memlekettik nómir paıdalanǵandar qylmystyq jaýapkershilikke tartylýy múmkin. Bul týraly Ishki ister vıse-mınıstri Sanjar Ádilov málimdedi, dep jazady Egemen.kz.
Májilistiń jalpy otyrysynda depýtat Baqytjan Bazarbek adam ólimimen aıaqtalǵan jol-kólik oqıǵalaryna kináli keıbir azamattardyń jalǵan nómirlerdi qoldanatynyn aıtty.
Onyń aıtýynsha, Qylmystyq kodekstiń 386-baby tek memlekettik nómirlerdi qoldan jasaý jáne olardy ótkizý áreketterin ǵana retteıdi. Al jalǵan nómirlerdi paıdalaný quqyq buzýshylyq ekenine qaramastan ákimshilik jaýapkershilikke jatqyzylǵan.
«Ákimshilik quqyq buzýshylyq týraly kodekstiń 590-babyna sáıkes, jalǵan nómir paıdalanǵan tulǵaǵa 15 aılyq eseptik kórsetkish (64 875 teńge) kóleminde aıyppul salynady. Bul aıyppul asa aýyr jaza emes. Al mundaı áreketterdiń saldarynan adam shyǵyny bolyp jatyr. Qaıtalanǵan jaǵdaıda 20 AEK (86 500 teńge) aıyppul nemese bir jylǵa júrgizýshi kýáliginen aıyrý qarastyrylǵan», dedi depýtat.
Oralda kóligine qaǵazdan jasalǵan jalǵan nómir taqqan júrgizýshi jaýapqa tartyldy
Osyǵan baılanysty ol mundaı quqyq buzýshylyq úshin qylmystyq jaýapkershilik engizýdi usyndy.
Vıse-mınıstr Sanjar Ádilov bul máseleniń ózekti ekenin rastady. Onyń sózinshe, jalǵan nómirler kóbine qylmystyq toptar tarapynan túrli paıdakúnemdik jáne múliktik quqyqbuzýshylyqtar jasaý kezinde qoldanylady.
«Jol-kólik oqıǵalaryna qatysty da jalǵan nómir qoldaný faktileri kezdesedi. Qazirgi tańda nómirdi qoldan jasaǵany úshin qylmystyq jaýapkershilik qarastyrylǵan. Degenmen, Qylmystyq kodekstiń 385-babyna uqsas túrde, ıaǵnı qoldan jasaýmen qatar ony paıdalanǵany úshin de qylmystyq jaýapkershilik engizý máselesin qarastyrý oryndy. Memlekettik tirkeý nómirlik belgisi – jol qaýipsizdiginiń mańyzdy elementi», dedi Sanjar Ádilov.
Elimizde jalǵan nómirmen júrgen 900-den astam júrgizýshi ustaldy
Ishki ister mınıstrligi depýtattyń bul usynysyn qylmystyq zańnamany qaıta qaraý aıasynda zerdelep kórmek.