Memleket basshysy Qasym-Jomart Toqaev Qatar Ámiri sheıh Támım ben Hamad Ál Tánı bastaǵan delegasııamen kezdesti. Bul týraly Aqorda baspasóz qyzmeti habarlady, dep jazady Egemen.kz.
Prezıdent Qasym-Jomart Toqaev sheıh Támım ben Hamad Ál Tánıge iltıpat bildire otyryp, Astana halyqaralyq forýmyna Qatar úkimeti men bıznes ókilderin bastap kelgeni úshin alǵys aıtty.
Memleket basshysy Qatar Qazaqstannyń Taıaý Shyǵystaǵy mańyzdy ári senimdi seriktesi ekenin atap ótip, búgingi kelissózder eki el arasyndaǵy yntymaqtasty odan ári damytýǵa tyń serpin beretinine senim bildirdi.
«Taıaý arada eki el arasyndaǵy dıplomatııalyq qarym-qatynastyń ornaǵanyna 30 jyl tolady. Bul – erekshe mereıli beles. Osy kezeńde biz tıimdi memleketaralyq yntymaqtastyqqa qol jetkizdik. Syndarly saıası dıalog qurdyq. Byltyr Siz elimizge memlekettik saparmen keldińiz. Sondaı-aq jýyrda Qazaqstan Premer-Mınıstri Qatarǵa saparmen baryp keldi. Bul – dástúrli dostyq pen berik áriptestiktiń aıqyn dáleli. Siz memleketterimizdiń arasyndaǵy yqpaldastyqty tereńdetýge zor úles qosyp kelesiz. Men muny joǵary baǵalaımyn. Qazaq-qatar baılanystaryn nyǵaıtý úshin Sizben birlese áreket etýge árdaıym daıynmyn. Qatar ınvestorlaryna barynsha qoldaý kórsetip, qolaıly jaǵdaı jasaımyz», dedi Memleket basshysy.
Prezıdenttiń aıtýynsha, Qazaqstan Qatarǵa jalpy quny 250 mıllıon dollar bolatyn 60-qa jýyq ónim túriniń eksportyn arttyrýǵa daıyn. Sondaı-aq iskerlik baılanystardy nyǵaıtý úshin eki el arasynda tikeleı áýe qatynastaryn ashý mańyzdy.
Kezdesý barysynda Qatar Ámiri sheıh Támım ben Hamad Ál Tánı qurmet kórsetkeni úshin Prezıdent Qasym-Jomart Toqaevqa rızashylyǵyn bildirdi.
«Astana halyqaralyq forýmyna shaqyrýyńyzdy qabyl alyp, Qazaqstanǵa kelip otyrmyn. Bul – men úshin zor qurmet. Byltyr qazan aıynda Qazaqstanda kezdeskennen keıin taǵy da júzdesip otyrǵanyma qýanyshtymyn. Bul – byltyrǵy kelissózder barysynda baýyrlas Qazaqstanmen aradaǵy qol jetkizilgen ýaǵdalastyqtardyń júzege asyrylýyn pysyqtaýǵa taǵy bir múmkindik. Menimen birge Qatardyń isker toptarynan quralǵan úlken delegasııa keldi. Bul eki eldiń arasyndaǵy yntymaqtastyqtyń tabysty bolýyna jol ashady dep oılaımyn. Túrli saladaǵy ekijaqty qarym-qatynas qarqyndy damyp keledi. Biz basqa da baǵyttardaǵy yntymaqtastyqtyń aýqymyn keńeıtýge nıettimiz», dedi sheıh Támım ben Hamad Ál Tánı.
Kezdesý barysynda taraptar elimizdiń Qatar ınvestorlarymen munaı-gaz, taý-ken jáne metallýrgııa, aýyl sharýashylyǵy, medısına, qarjy salalaryndaǵy birlesken jobalardy júzege asyrý perspektıvalaryn talqylady. Sondaı-aq halyqaralyq uıymdar aıasyndaǵy ózara tıimdi yntymaqtastyq máselelerin qarastyrdy.